សម្ដេចក្រឡាហោម ស ខេង និងឯកឧត្តមអភិសន្តិបណ្ឌិត ស សុខា អញ្ជើញជាអធិបតីក្នុងពិធីកាន់បិណ្ឌវេនទី១១ នៅវត្តពោធិ៍វាល ខេត្តបាត់ដំបង

ខេត្តបាត់ដំបង៖ នាព្រឹកថ្ងៃពុធ ១១រោច ខែភទ្របទ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី៧ ខែតុលា ឆ្នាំ២០២៦ នេះ សម្ដេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ និងជាអ្នកតំណាងរាស្ត្រមណ្ឌលខេត្តបាត់ដំបង និងលោកជំទាវ ញ៉ែម សាខន ស ខេង ព្រមទាំង ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ កែ សួនសុភី ស សុខា ព្រមទាំងបុត្រា បុត្រី និងក្រុមគ្រួសារ បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីកាន់បិណ្ឌវេនទី១១ នៃពិធីបុណ្យភ្ជុំបិណ្ឌ ដែលជាពិធីបុណ្យប្រពៃណីជាតិដ៏ធំ និងមានសារៈសំខាន់បំផុតរបស់ពុទ្ធសាសនិកខ្មែរ។

ពិធីសាសនាដ៏ប្រពៃថ្លៃថ្លានេះ ត្រូវបានប្រពៃបង្កើតឡើងនៅវត្តពោធិ៍មង្គលលារាម (ហៅវត្តពោធិ៍វាល) ស្ថិតក្នុងសង្កាត់រតនៈ ក្រុងបាត់ដំបង ខេត្តបាត់ដំបង ដោយមានការអញ្ជើញចូលរួមយ៉ាងច្រើនកុះករពីសំណាក់ឯកឧត្តម លោកជំទាវ លោក លោកស្រី ជាថ្នាក់ដឹកនាំក្រសួង-ស្ថាប័ន អាជ្ញាធរដែនដីខេត្តបាត់ដំបង មន្ត្រីរាជការ កងកម្លាំងប្រដាប់អាវុធ ព្រមទាំងបងប្អូនប្រជាពលរដ្ឋ និងពុទ្ធបរិស័ទចំណុះជើងវត្តយ៉ាងកុះករ។

នៅក្នុងឱកាសដ៏មហោឡារារឹកនេះ សម្ដេចក្រឡាហោម និងឯកឧត្តមអភិសន្តិបណ្ឌិត ព្រមទាំងលោកជំទាវ និងក្រុមគ្រួសារ បានអញ្ជើញធ្វើពិធីនមស្ការព្រះរតនត្រ័យ សមាទានសីល និមន្តព្រះសង្ឃចម្រើនព្រះបរិត្ត និងវេរភត្តាហារ ព្រមទាំងនាំយកនូវបច្ច័យ គ្រឿងឧបភោគបរិភោគ និងទេយ្យទានជាច្រើនប្រគេនចំពោះព្រះសង្ឃដែលកំពុងគង់ចាំវស្សាអស់ត្រីមាសក្នុងវត្តពោធិ៍វាល ដើម្បីទ្រទ្រង់ដល់ការសិក្សារៀនសូត្រ និងការប្រតិបត្តិធម៌វិន័យរបស់ព្រះសង្ឃ។
ការរៀបចំពិធីកាន់បិណ្ឌនេះ ធ្វើឡើងក្នុងគោលបំណង៖

ឧទ្ទិសកុសលផលបុណ្យ៖ ជូនចំពោះដួងវិញ្ញាណក្ខន្ធបុព្វការីជន មានមាតាបិតា ជីដូនជីតា គ្រូឧបជ្ឈាយាចារ្យ និងញាតិកាលទាំងប្រាំពីរសណ្ដាន ព្រមទាំងបុព្វបុរសជាតិ និងយុទ្ធជនពលី ពិការ ដែលបានលះបង់សាច់ស្រស់ឈាមស្រស់ ដើម្បីបុព្វហេតុការពារ ការពារបូរណភាពទឹកដី និងសន្តិភាពជូនមាតុភូមិ។

លើកស្ទួយព្រះពុទ្ធសាសនា និងប្រពៃណីជាតិ៖ ដើម្បីចូលរួមថែរក្សា ការពារ និងលើកកម្ពស់វប្បធម៌ ប្រពៃណី ទំនៀមទម្លាប់ជាតិឱ្យបានគង់វង្ស និងរីកចម្រើនតរៀងទៅ។

បួងសួងសុំសេចក្តីសុខ៖ ប្រសិទ្ធពរជ័យ សិរីសួស្តី ជ័យមង្គល និងវិបុលសុខជូនដល់ប្រជាពលរដ្ឋកម្ពុជាគ្រប់ទិសទី និងសូមឱ្យប្រទេសជាតិបន្តរស់នៅក្នុងសុខសន្តិភាព និងការអភិវឌ្ឍជាភិយ្យោភាព។

ពិធីកាន់បិណ្ឌ និងភ្ជុំបិណ្ឌ មិនត្រឹមតែជាពិធីបុណ្យតាមបែបសាសនាយ៉ាងខ្ជាប់ខ្ជួនប៉ុណ្ណោះទេ ប៉ុន្តែថែមទាំងជាឱកាសដ៏មានតម្លៃក្នុងការជួបជុំសាច់ញាតិ បង្កើតនូវកតញ្ញូតាធម៌ និងពង្រឹងស្មារតីសាមគ្គីភាពយ៉ាងរឹងមាំក្នុងចំណោមប្រជាជាតិខ្មែរទាំងមូលផងដែរ៕អត្ថបទការិ.ព័ត៌មាន លោក ឃិន ជុន