រដ្ឋបាលខេត្តកំពង់ឆ្នាំង រៀបចំពិធីគោរពព្រះវិញ្ញាណក្ខន្ធ ព្រះករុណា ព្រះបរមរតនកោដ្ឋ ខួបលើកទី១៤
កំពង់ឆ្នាំង៖ នាព្រឹកថ្ងៃទី១៤ ខែតុលា ឆ្នាំ២០២៦ ថ្នាក់ដឹកនាំរដ្ឋបាលខេត្តកំពង់ឆ្នាំង រួមជាមួយសមាជិកព្រឹទ្ធសភា និងសមាជិករដ្ឋសភា បានប្រារព្ធពិធីគោរពព្រះវិញ្ញាណក្ខន្ធ គម្រប់ខួប ១៤ឆ្នាំ នៃការយាងចូលទិវង្គតរបស់ ព្រះករុណា ព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ «ព្រះបរមរតនកោដ្ឋ»។
ពិធីនេះបានប្រព្រឹត្តិទៅក្រោមអធិបតីភាព ឯកឧត្តម ស៊ុន សុវណ្ណារិទ្ធិ អភិបាលនៃគណៈអភិបាលខេត្តកំពង់ឆ្នាំង និង ឯកឧត្តម ស៊ីវ រុន ប្រធានក្រុមប្រឹក្សាខេត្ត ដោយមានការនិមន្តចូលរួមពីព្រះមន្ត្រីសង្ឃខេត្ត ព្រមទាំងមានការអញ្ជើញចូលរួមពីលោក លោកស្រី ជាថ្នាក់ដឹកនាំមន្ទីរ អង្គភាព និងមន្ត្រីរាជការជុំវិញខេត្តយ៉ាងច្រើនកុះករ។
ពិធីគោរពព្រះវិញ្ញាណក្ខន្ធត្រូវបានរៀបចំឡើងយ៉ាងអធិកអធ័ម និងស្របតាមគន្លងប្រពៃណីព្រះពុទ្ធសាសនា ដោយមានការប្រារព្ធពិធីបង្សុកូល និងបួងសួងឧទ្ទិសថ្វាយនូវមហាព្រះរាជកុសល ចំពោះព្រះវិញ្ញាណក្ខន្ធ ព្រះករុណា ព្រះបរមរតនកោដ្ឋ ដើម្បីសម្តែងនូវកតញ្ញូតាធម៌ និងការចងចាំជានិច្ចនូវព្រះគុណដ៏ថ្លៃថ្លាប្រកបដោយមហាករុណាទិគុណដ៏ជ្រាលជ្រៅបំផុត ចំពោះជាតិមាតុភូមិ និងប្រជារាស្ត្រខ្មែរ៕អត្ថបទការិ.ព័ត៌មាន លោក ឃិន ជុន
No comments:
Post a Comment