ឯកឧត្តម យស ណាស៊ី ប្រធានក្រុមប្រឹក្សាខេត្ត និងឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ បានអញ្ជើញចូលរួមជាកិត្តិយសក្នុងពិធីបុណ្យឆ្លងព្រះវិហារ និងសមិទ្ធផលនានាក្នុងវត្តគិរីវង្សក្រោមអធិបតីភាពដ៏ខ្ពង់ខ្ពស់ សម្តេចព្រះពុទ្ធជ័យមុនី បណ្ឌិត ឃឹម សន សម្តេចនាយករងទី៣គណៈមហានិកាយ នៃព្រះរាជាណាចក្រកម្ពុជា ព្រះរាជតំណាងដ៏ខ្ពង់ខ្ពស់ សម្តេចព្រះមហាសុមេធាធិបតី កិត្តិបណ្ឌិត អំ លីមហេង សម្តេចព្រះនាយកគណៈមហានិកាយ នៃព្រះរាជាណាចក្រកម្ពុជា ស្ថិតនៅភូមិដីក្រហម ឃុំព្រៃរំដេង ស្រុកគិរីវង់ ខេត្តតកែវ៕

ខេត្តតាកែវ ៖ ព្រឹកថ្ងៃសុក្រ ៧កើត ខែភទ្របទ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១៨ ខែកញ្ញា ឆ្នាំ២០២៦ សម្តេចព្រះពុទ្ធជ័យមុនី បណ្ឌិត ឃឹម សន សម្តេចនាយករងទី៣ នៃគណៈមហានិកាយ នៃ ព្រះរាជាណាចក្រកម្ពុជា យាងជាព្រះរាជតំណាងដ៏ខ្ពង់ខ្ពស់ សម្តេចព្រះមហាសុមេធាធិបតី កិត្តិបណ្ឌិត អំ លីមហេង សម្តេចព្រះនាយកគណៈមហានិកាយ នៃព្រះរាជាណាចក្រកម្ពុជា អមដំណើរដោយ
ឯកឧត្តម យស ណាស៊ី ប្រធានក្រុមប្រឹក្សាខេត្តតាកែវនិងឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ រួមទាំងព្រះមន្ត្រីសង្ឃ ព្រះសង្ឃគ្រប់ព្រះអង្គ មន្ត្រីរាជការជុំវិញខេត្ត កងកម្លាំងប្រដាប់អាវុធទាំងបីប្រភេទ អាជ្ញាធរមូលដ្ឋានស្រុក-ឃុំ ព្រមទាំងលោកយាយ លោកតា គ្រូបង្រៀន សិស្សានុសិស្ស និងពុទ្ធបរិស័ទចំណុះជើងវត្តយ៉ាងច្រើនកុះករ។ គណៈអធិបតី និងថ្នាក់ដឹកនាំបានអញ្ជើញកាត់ខ្សែបូសម្ពោធឆ្លងព្រះវិហារ និងសមិទ្ធផលនានាជាផ្លូវការ ទៅតាមក្បួនខ្នាត និងទំនៀមទម្លាប់ព្រះពុទ្ធសាសនា ដើម្បីដាក់ឱ្យប្រកបពិធីបុណ្យសាសនាផ្សេងៗនាពេលខាងមុខ ។

ពិធីនេះប្រារព្ធឡើងដើម្បីឆ្លុះបញ្ចាំងពីការរីកចម្រើននៃវិស័យពុទ្ធសាសនា ដែលជាសាសនារបស់រដ្ឋ តាមរយៈការចូលរួមសហការគ្នាយ៉ាងជិតស្និទ្ធរវាងពុទ្ធចក្រ និងអាណាចក្រ ថ្នាក់ដឹកនាំខេត្ត និងគណៈអធិបតីបានសម្តែងនូវការកោតសរសើរ និងថ្លែងអំណរគុណយ៉ាងជ្រាលជ្រៅចំពោះព្រះចៅអធិការវត្ត គណៈកម្មការ អាជ្ញាធរដែនដី ព្រមទាំងសប្បុរសជន និងពុទ្ធបរិស័ទជិតឆ្ងាយទាំងអស់ ដែលបានបរិច្ចាគបច្ច័យ និងកម្លាំងកាយចិត្តក្នុងការកសាងសមិទ្ធផលទាំងនេះទុកជាប្រយោជន៍សាធារណៈ និងជាទីសក្ការបូជារបស់ពុទ្ធសាសនិកជន។អត្ថបទការិយាល័យព័ត៌មាន លោក ឃិន ជុន