ក្រសួងរៀបចំដែនដី នគរូបនីយកម្ម និងសំណង់ ក្នុងនាមគណៈកម្មការសុរិយោដីថ្នាក់ជាតិ និងអាជ្ញាធរជាតិដោះស្រាយទំនាស់ដីធ្លី

ភ្នំពេញ នៅថ្ងៃទី ២៩ ខែ កញ្ញា ឆ្នាំ ២០២៦ ក្រសួងរៀបចំដែនដី នគរូបនីយកម្ម និង សំណង់បានសម្រុះសម្រួលដោះស្រាយបញ្ចប់ករណីវិវាទដីធ្លី ០៣ទីតាំង រវាងឈ្មោះ រតនៈ សម្បត្តិ និងប្រជាពលរដ្ឋ ស្ថិតក្នុងភូមិសាស្ត្រខេត្តព្រះសីហនុ តាមគោលការណ៍ ឈ្នះឈ្នះ ដោយតម្រូវឱ្យមានការចូលរួម សហការ ប្តូរទីតាំង បន្ថយទំហំ និងរួមគ្នារៀបចំប្រព័ន្ធហេដ្ឋារចនាសម្ព័ន្ធ តាមបែបនគរូបនីយកម្មទំនើប ដើម្បីឱ្យគ្រប់ភាគីពាក់ព័ន្ធទទួលបាននូវបណ្ណកម្មសិទ្ធិស្របច្បាប់វិញ។

ការសម្រុះសម្រួលនេះក្នុងទិសដៅប្រែក្លាយពី ទីតាំងដីមានទំនាស់ទាំងនេះ ឱ្យទៅជាដីមានសក្តានុពលសេដ្ឋកិច្ច ជាភូមិឋានក្សេមក្សាន្ត ដែលមានសណ្តាប់ធ្នាប់ និង សោភណភាព បង្កលក្ខណៈងាយស្រួលដល់ការប្រកបរបរចិញ្ចឹមជីវិត និងការរស់នៅរបស់បងប្អូនប្រជាពលរដ្ឋ ដែល ជាទ្រនំសុភមង្គល ហើយក៏ជាដីកេរមរតកនៃក្តីសង្ឃឹមរបស់កូនចៅតជំនាន់រៀងៗខ្លួន។