លោក យ៉ាវ សានិន អភិបាលស្រុកព្រះស្ដេច អញ្ជើញចូលរួមកាន់បិណ្ឌវេនទី៨ នៅវត្តឯករាជ្យ និងវត្តត្មាតកាង ក្នុងស្រុកកំពង់ត្របែក
ខេត្តព្រៃវែង៖ ក្នុងបរិយាកាសរីករាយ និងជ្រះថ្លានៃពិធីបុណ្យភ្ជុំបិណ្ឌ ដែលជាពិធីបុណ្យប្រពៃណីជាតិដ៏ធំមួយរបស់ពុទ្ធសាសនិកខ្មែរ លោក យ៉ាវ សានិន អភិបាលនៃគណៈអភិបាលស្រុកព្រះស្ដេច ព្រមទាំងក្រុមគ្រួសារ បានអញ្ជើញចូលរួមក្នុងពិធីកាន់បិណ្ឌវេនទី៨ នៅវត្តចំនួនពីរ រួមមាន វត្តឯករាជ្យ និង វត្តត្មាតកាង ដែលស្ថិតនៅក្នុងស្រុកកំពង់ត្របែក ខេត្តព្រៃវែង។
នៅក្នុងឱកាសប្រកបដោយសទ្ធាជ្រះថ្លានេះ លោកអភិបាលស្រុក និងក្រុមគ្រួសារ ព្រមទាំងពុទ្ធបរិស័ទជិតឆ្ងាយ បានរួមគ្នាវេរភត្តាហារ បច្ច័យ និងទេយ្យវត្ថុផ្សេងៗ ប្រគេនដល់ព្រះសង្ឃដែលគង់ចាំព្រះវស្សាអស់ត្រីមាស ដើម្បីទ្រទ្រង់ដល់ព្រះពុទ្ធសាសនា និងដើម្បីឧទ្ទិសកុសលផលបុណ្យជូនដល់បុព្វការីជន មានមាតាបិតា ជីដូនជីតា និងញាតិកាទាំងប្រាំពីរសណ្ដាន ដែលបានចែកឋានទៅកាន់លោកខាងមុខ។
ការអញ្ជើញចូលរួមក្នុងពិធីបុណ្យនេះ មិនត្រឹមតែជាការបំពេញកុសលតាមបែបព្រះពុទ្ធសាសនានោះទេ ប៉ុន្តែថែមទាំងបានបង្ហាញពីការយកចិត្តទុកដាក់ ស្មារតីសាមគ្គីភាព និងការថែរក្សាប្រពៃណីទំនៀមទម្លាប់ជាតិដ៏ល្អផូរផង់ រវាងអាជ្ញាធរដែនដី និងបងប្អូនប្រជាពុទ្ធបរិស័ទនៅក្នុងមូលដ្ឋានផងដែរ៕អត្ថបទការិ.ព័ត៌មាន លោក ឃិន ជុន
No comments:
Post a Comment