លោក យ៉ាវ សានិន អភិបាលស្រុកព្រះស្ដេច អញ្ជើញដឹកនាំកិច្ចប្រជុំគណៈបញ្ជាការឯកភាពរដ្ឋបាលស្រុក ប្រចាំខែតុលា និងដាក់ចេញទិសដៅការងារអនុវត្តបន្ត

ស្រុកព្រះស្ដេច៖ នៅព្រឹកថ្ងៃទី២៣ ខែតុលា ឆ្នាំ២០២៦ នេះ លោក យ៉ាវ សានិន អភិបាល នៃគណៈអភិបាលស្រុកព្រះស្ដេច បានអញ្ជើញជាអធិបតីភាពដ៏ខ្ពង់ខ្ពស់ ក្នុងកិច្ចប្រជុំគណៈបញ្ជាការឯកភាពរបស់រដ្ឋបាលស្រុក ប្រចាំខែតុលា និងលើកទិសដៅអនុវត្តការងារបន្ត ដើម្បីពង្រឹងសន្តិសុខ សណ្ដាប់ធ្នាប់សាធារណៈ និងប្រសិទ្ធភាពការងាររដ្ឋបាលក្នុងមូលដ្ឋាន។

កិច្ចប្រជុំដ៏មានសារៈសំខាន់នេះ មានការអញ្ជើញចូលរួមយ៉ាងកុះករពីសំណាក់៖

លោក លោកស្រី អភិបាលរងស្រុក

លោក លោកស្រី នាយក នាយករងរដ្ឋបាលស្រុក

កងកម្លាំងប្រដាប់អាវុធទាំង៣ ប្រភេទ

លោក លោកស្រី ប្រធានការិយាល័យ និងអង្គភាពជុំវិញស្រុក

លោក លោកស្រី មេឃុំ នាយប៉ុស្តិ៍នគរបាលរដ្ឋបាល ប្រធានមណ្ឌលសុខភាព និងមន្ត្រីកសិកម្មឃុំ ទាំង១១ ឃុំ

លោក លោកស្រី នាយក នាយិកា វិទ្យាល័យទាំង៣

លោក លោកស្រី នាយកសាលាអនុវិទ្យាល័យទាំង៩ និងប្រធានកម្រងបឋមសិក្សាទាំង១១ ក្នុងស្រុកព្រះស្ដេច។

ក្នុងឱកាសនោះ លោក យ៉ាវ សានិន អភិបាលស្រុកព្រះស្ដេច បានថ្លែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់អាជ្ញាធរឃុំ កងកម្លាំងមានសមត្ថកិច្ច និងមន្ត្រីរាជការគ្រប់ផ្នែកទាំងអស់ ដែលបានសហការគ្នាយ៉ាងល្អប្រសើរបម្រើប្រជាពលរដ្ឋនាពេលកន្លងមក។ជាមួយគ្នានេះ លោកអភិបាលស្រុក បានផ្តាំផ្ញើ និងផ្តល់អនុសាសន៍ណែនាំសំខាន់ៗដល់អង្គប្រជុំ រួមមាន៖

១. ការងារសន្តិសុខ និងសណ្តាប់ធ្នាប់សាធារណៈ៖ បន្តជំរុញ និងពង្រឹងការអនុវត្តគោលនយោបាយ «ភូមិ-ឃុំ-សង្កាត់មានសុវត្ថិភាព» ឱ្យកាន់តែមានប្រសិទ្ធភាព ដោយបង្កើនការល្បាត ការពារ ទប់ស្កាត់ និងបង្ក្រាបបទល្មើសគ្រប់ប្រភេទ ជាពិសេសបញ្ហាល្បែងស៊ីសងខុសច្បាប់ និងគ្រោះថ្នាក់ចរាចរណ៍ក្នុងមូលដ្ឋាន។

២. ការផ្តល់សេវាសាធារណៈ៖ ត្រូវយកចិត្តទុកដាក់ខ្ពស់ក្នុងការផ្តល់សេវារដ្ឋបាលជូនប្រជាពលរដ្ឋតាមរយៈការិយាល័យច្រកចេញចូលតែមួយ និងយន្តការថ្នាក់ឃុំ ឱ្យបានឆាប់រហ័ស មានតម្លាភាព សុជីវធម៌ និងមិនត្រូវឱ្យមានការរអ៊ូរទាំពីសំណាក់ប្រជាពលរដ្ឋឡើយ។

៣. ការងារកសិកម្ម និងសុខភាពសាធារណៈ៖ ចុះពិនិត្យ និងតាមដានស្ថានភាពជីវភាព ដំណាំកសិកម្ម ព្រមទាំងការថែទាំសុខភាពប្រជាពលរដ្ឋនៅតាមមូលដ្ឋានឃុំទាំង១១ ដោយមានកិច្ចសហការជិតស្និទ្ធរវាងមន្ត្រីកសិកម្មឃុំ និងមណ្ឌលសុខភាព។

៤. វិស័យអប់រំ៖ ណែនាំដល់លោកនាយក នាយិកា សាលារៀនទាំងអស់ ឱ្យបន្តយកចិត្តទុកដាក់លើការគ្រប់គ្រងការសិក្សារបស់សិស្សានុសិស្ស ការពង្រឹងវិន័យ និងបរិស្ថានអនាម័យក្នុងបរិវេណសាលារៀនឱ្យបានល្អប្រសើរ។

លោកអភិបាលស្រុក ក៏បានជំរុញឱ្យសមាសភាពចូលរួមទាំងអស់ បន្តពង្រឹងស្មារតីទទួលខុសត្រូវ សាមគ្គីភាពផ្ទៃក្នុង និងសហការគ្នាជិតស្និទ្ធ ដើម្បីឆ្លើយតបទៅនឹងសំណូមពរ ក៏ដូចជាដោះស្រាយបញ្ហាប្រឈមនានារបស់ប្រជាពលរដ្ឋឱ្យបានទាន់ពេលវេលា និងមានប្រសិទ្ធភាពខ្ពស់បំផុត៕

អត្ថបទការិ.ព័ត៌មាន លោក ឃិន ជុន