រដ្ឋបាលខេត្តតាកែវ បើកកិច្ចប្រជុំគណៈអភិបាលខេត្ត ដើម្បីពិនិត្យ និងអនុម័តលើសំណើការងាររចនាសម្ព័ន្ធ សំដៅពង្រឹងប្រសិទ្ធភាពសេវាសាធារណៈ និងការអភិវឌ្ឍមូលដ្ឋាន
តាកែវ៖ នៅថ្ងៃសុក្រ ទី២៣ ខែតុលា ឆ្នាំ២០២៦ នេះ រដ្ឋបាលខេត្តតាកែវ បានរៀបចំកិច្ចប្រជុំគណៈអភិបាលខេត្ត ក្រោមអធិបតីភាពដ៏ខ្ពង់ខ្ពស់របស់ ឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ ដោយមានការអញ្ជើញចូលរួមពីលោក-លោកស្រី អភិបាលរងខេត្ត ថ្នាក់ដឹកនាំរដ្ឋបាលក្រុង-ស្រុក ប្រធានមន្ទីរ-អង្គភាពជុំវិញខេត្ត និងមន្ត្រីពាក់ព័ន្ធជាច្រើនរូប។
កិច្ចប្រជុំនេះរៀបចំឡើងក្នុងគោលបំណង ពិនិត្យ ពិភាក្សា និងអនុម័តលើសំណើរបស់រដ្ឋបាលក្រុង-ស្រុក និងបណ្តាមន្ទីរ-អង្គភាពជុំវិញខេត្ត លើការបំពេញមុខងារ និងភារកិច្ចក្នុងរចនាសម្ព័ន្ធគ្រប់គ្រង សំដៅធានាឱ្យបាននូវនិរន្តរភាពការងារ ប្រសិទ្ធភាពនៃការផ្តល់សេវាសាធារណៈជូនប្រជាពលរដ្ឋ និងការជំរុញល្បឿននៃការអភិវឌ្ឍនៅថ្នាក់មូលដ្ឋានឱ្យកាន់តែមានភាពរីកចម្រើន។
នៅក្នុងឱកាសនោះ ឯកឧត្តម វ៉ី សំណាង អភិបាលខេត្តតាកែវ បានផ្តល់ប្រសាសន៍ណែនាំ និងក្រើនរំលឹកយ៉ាងម៉ឺងម៉ាត់ដល់ថ្នាក់ដឹកនាំអាជ្ញាធរក្រុង-ស្រុក និងមន្ទីរ-អង្គភាពទាំងអស់ថា៖
«ការបំពេញមុខងារ និងការទទួលខុសត្រូវតាមរចនាសម្ព័ន្ធ មិនមែនគ្រាន់តែជាការងាររដ្ឋបាលលើក្រដាសនោះទេ ប៉ុន្តែជាគន្លឹះសំខាន់ក្នុងការបម្រើប្រជាពលរដ្ឋដោយផ្ទាល់។ គ្រប់អាជ្ញាធរ និងមន្ត្រីពាក់ព័ន្ធទាំងអស់ ត្រូវតែបង្កើនស្មារតីទទួលខុសត្រូវខ្ពស់ បម្រើសេវាសាធារណៈជូនប្រជាពលរដ្ឋឱ្យបានលឿន រហ័ស តម្លាភាព និងប្រកបដោយឥរិយាបថរាក់ទាក់។ បញ្ហាប្រឈម ឬសំណើផ្សេងៗនៅថ្នាក់មូលដ្ឋាន ត្រូវរួមគ្នាដោះស្រាយឱ្យទាន់ពេលវេលា ដើម្បីឆ្លើយតបទៅនឹងតម្រូវការជាក់ស្តែង និងបង្កើនជំនឿទុកចិត្តពីបងប្អូនប្រជាពលរដ្ឋមកលើរាជរដ្ឋាភិបាល។»
ឯកឧត្តមអភិបាលខេត្ត ក៏បានគូសបញ្ជាក់បន្ថែមអំពីការសហការគ្នាយ៉ាងជិតស្និទ្ធរវាងមន្ទីរជំនាញ និងអាជ្ញាធរមូលដ្ឋាន ដើម្បីរួមគ្នាជំរុញការងារហេដ្ឋារចនាសម្ព័ន្ធ សន្តិសុខសុវត្ថិភាពសង្គម និងការលើកកម្ពស់ជីវភាពរស់នៅរបស់ប្រជាពលរដ្ឋក្នុងខេត្តតាកែវទាំងមូលឱ្យកាន់តែប្រសើរឡើងជាលំដាប់។
កិច្ចប្រជុំបានប្រព្រឹត្តទៅដោយបរិយាកាសស្និទ្ធស្នាល ផុសផុល និងបានបញ្ចប់ទៅដោយលទ្ធផលជោគជ័យ និងទទួលបានការឯកភាពខ្ពស់លើរបៀបវារៈដែលបានលើកយកមកពិភាក្សា៕
ប្រភព៖ រដ្ឋបាលខេត្តតាកែវ
No comments:
Post a Comment