សម្ដេចក្រឡាហោម ស ខេង និងថ្នាក់ដឹកនាំក្រសួងមហាផ្ទៃ អញ្ជើញចូលរួមពិធីសូត្រមន្តកាន់បិណ្ឌវេនទី១០ នៅវត្តមុនីប្រសិទ្ធីវង្ស

រាជធានីភ្នំពេញ៖ នាផ្លូវការរសៀលថ្ងៃចន្ទ ៩រោច ខែភទ្របទ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី៥ ខែតុលា ឆ្នាំ២០២៦នេះ សម្ដេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ និងលោកជំទាវ ញ៉ែម សាខន ស ខេង អមដំណើរដោយ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ កែ សួនសុភី ស សុខា ព្រមទាំង ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងលោកជំទាវ ជា ផល្គុន បានអញ្ជើញចូលរួមក្នុងពិធីសូត្រមន្តកាន់បិណ្ឌវេនទី១០ ដែលបានប្រព្រឹត្តទៅនៅវត្តមុនីប្រសិទ្ធីវង្ស ស្ថិតក្នុងសង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។

ពិធីបុណ្យនេះក៏មានការអញ្ជើញចូលរួមយ៉ាងច្រើនកុះករពីសំណាក់ថ្នាក់ដឹកនាំ មន្ត្រីរាជការស៊ីវិល មន្ត្រីនគរបាលជាតិ មន្ត្រីពន្ធនាគារនៃក្រសួងមហាផ្ទៃ ព្រមទាំងក្រុមគ្រួសារ និងប្រជាពុទ្ធបរិស័ទជិតឆ្ងាយ ប្រកបដោយទឹកមុខជ្រះថ្លា និងស្មារតីសាមគ្គីភាពយ៉ាងក្រៃលែង។

ពិធីសូត្រមន្តកាន់បិណ្ឌនាឱកាសនេះ ត្រូវបានរៀបចំឡើងតាមគន្លងប្រពៃណីព្រះពុទ្ធសាសនា ក្នុងគោលបំណងឧទ្ទិសនូវមហាកុសលជូនចំពោះ៖
លោកអ្នកមានគុណ៖ បុព្វការីជន មាតាបិតា និងជីដូនជីតា ដែលបានចែកឋានទៅកាន់លោកខាងមុខ។
វីរជន និងបុព្វបុរសជាតិ៖ បុព្វបុរសជាតិ មន្ត្រីរាជការ វីរៈកងទ័ព វីរៈនគរបាលជាតិ ព្រមទាំងយុទ្ធជន និងយុទ្ធនារី ដែលបានពលីជីវិត និងទទួលមរណភាពក្នុងបុព្វហេតុការពារជាតិ មាតុភូមិ និងសន្តិសុខសង្គម។

ក្នុងងបរិយាកាសដ៏អធិកអធម និងសន្ធោសន្ធៅនៃជំនឿសាសនា អ្នកចូលរួមទាំងអស់បានរួមចិត្តរួមថ្លើមប្រគេន ទេយ្យទានផ្សេងៗ និងបច្ច័យបូជាចំពោះព្រះសង្ឃនិងបានអញ្ជើញថ្វាយកម្រងផ្កា គ្រឿងសក្ការៈបូជា នមស្ការព្រះរតនត្រ័យ សមាទានសីល និមន្តព្រះសង្ឃចម្រើនព្រះបរិត្ត សម្តែងធម៌ទេសនា ដើម្បីទ្រទ្រង់វិស័យព្រះពុទ្ធសាសនា ដែលជាសាសនារបស់រដ្ឋ ឱ្យបានគង់វង្ស និងរីកចម្រើនតទៅមុខទៀត៕អត្ថបទការិ.ព័ត៌មាន លោក ឃិន ជុន