ឯកឧត្តម សួន សុម៉ាលីន ដឹកនាំកិច្ចប្រជុំពិនិត្យវឌ្ឍនភាព និងចុះត្រួតពិនិត្យទីតាំងផ្ទាល់ ដើម្បីត្រៀមរៀបចំព្រឹត្តិការណ៍ប្រណាំងទូក «ង» ខេត្តព្រៃវែង ឆ្នាំ២០២៦

 ឯកឧត្តម សួន សុម៉ាលីន ដឹកនាំកិច្ចប្រជុំពិនិត្យវឌ្ឍនភាព និងចុះត្រួតពិនិត្យទីតាំងផ្ទាល់ ដើម្បីត្រៀមរៀបចំព្រឹត្តិការណ៍ប្រណាំងទូក «ង» ខេត្តព្រៃវែង ឆ្នាំ២០២៦

​ខេត្តព្រៃវែង៖ នាព្រឹកថ្ងៃទី១៦ ខែតុលា ឆ្នាំ២០២៦ ឯកឧត្តម សួន សុម៉ាលីន អភិបាល នៃគណៈអភិបាលខេត្តព្រៃវែង បានអញ្ជើញជាអធិបតីដឹកនាំកិច្ចប្រជុំពិនិត្យវឌ្ឍនភាពការងាររបស់អនុគណៈកម្មការនីមួយៗ ក្នុងការត្រៀមរៀបចំព្រឹត្តិការណ៍ប្រណាំងទូក «ង» ខេត្តព្រៃវែង ឆ្នាំ២០២៦ ដែលកិច្ចប្រជុំនេះបានប្រព្រឹត្តទៅនៅសាលប្រជុំពហុបំណង «B» សាលាខេត្តព្រៃវែង។
​កិច្ចប្រជុំនេះមានការអញ្ជើញចូលរួមពី៖ ឯកឧត្តម លោកជំទាវ អភិបាលរងខេត្ត, លោក លោកស្រី នាយក នាយករងរដ្ឋបាលសាលាខេត្ត, មេបញ្ជាការកងកម្លាំងប្រដាប់អាវុធទាំងបី, ប្រធានពន្ធនាគារខេត្ត, លោក លោកស្រី ប្រធានមន្ទីរ-អង្គភាពជុំវិញខេត្ត, អភិបាល នៃគណៈអភិបាលក្រុង-ស្រុកទាំង១៣, នាយកទីចាត់ការ ប្រធានអង្គភាព និងប្រធានផ្នែកចំណុះសាលាខេត្ត ព្រមទាំងតំណាងក្រុមហ៊ុនសំណង់ ឈ្នះ ឈ្នះ, តំណាងក្រុមហ៊ុន វឌ្ឍនៈប្រ៊ូវើរី (Vattanac Brewery) និងមន្ត្រីជំនាញពាក់ព័ន្ធជាច្រើនរូប។

​ក្នុងឱកាសនោះ ឯកឧត្តម សួន សុម៉ាលីន បានថ្លែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់អនុគណៈកម្មការនីមួយៗ ដែលបានបំពេញភារកិច្ចនាពេលកន្លងមក។ ជាមួយគ្នានេះ ដើម្បីឱ្យព្រឹត្តិការណ៍ប្រណាំងទូកប្រព្រឹត្តទៅដោយរលូន មានសុវត្ថិភាព និងទទួលបានជោគជ័យខ្ពស់ ឯកឧត្តមអភិបាលខេត្ត បានផ្តល់អនុសាសន៍ និងណែនាំដល់ផ្នែកពាក់ព័ន្ធនូវចំណុចសំខាន់ៗមួយចំនួន រួមមាន៖

​១. សន្តិសុខ និងសណ្តាប់ធ្នាប់សាធារណៈ៖ កងកម្លាំងប្រដាប់អាវុធទាំងបីត្រូវសហការគ្នាយ៉ាងម៉ឹងម៉ាត់ក្នុងការការពារសុវត្ថិភាព រក្សាសន្តិសុខ សណ្តាប់ធ្នាប់ និងសម្រួលចរាចរណ៍ជូនប្រជាពលរដ្ឋ និងភ្ញៀវទេសចរដែលមកកម្សាន្តឱ្យបានល្អប្រសើរ។

២. អនាម័យ និងបរិស្ថាន៖ អាជ្ញាធរក្រុង-ស្រុក និងមន្ទីរជំនាញត្រូវយកចិត្តទុកដាក់ខ្ពស់លើការថែរក្សាអនាម័យ បរិស្ថាន ការរៀបចំធុងសំរាម និងការសម្អាតទីតាំងប្រារព្ធពិធីជាប្រចាំ។

៣. សង្គ្រោះបន្ទាន់ និងសុខាភិបាល៖ មន្ទីរសុខាភិបាលត្រូវរៀបចំក្រុមគ្រូពេទ្យ និងរថយន្តសង្គ្រោះបន្ទាន់ប្រចាំការ ដើម្បីត្រៀមអន្តរាគមន៍ជួយសង្គ្រោះ និងពិនិត្យព្យាបាលជំងឺជូនកីឡាករ និងប្រជាពលរដ្ឋបានទាន់ពេលវេលា។

៤. ការតុបតែង និងការកម្សាន្ត៖ ត្រូវរៀបចំលម្អភ្លើងពណ៌ ឆាកតន្ត្រី ស្តង់ពិព័រណ៍ និងការបាញ់កាំជ្រួច ដើម្បីបង្កើតបរិយាកាសរីករាយ និងទាក់ទាញភ្ញៀវទេសចរមកកម្សាន្តឱ្យបានច្រើនកុះករ។

​បន្ទាប់ពីបញ្ចប់កិច្ចប្រជុំ ឯកឧត្តម សួន សុម៉ាលីន រួមជាមួយថ្នាក់ដឹកនាំខេត្ត និងក្រុមការងារគណៈកម្មការរៀបចំព្រឹត្តិការណ៍ បានអញ្ជើញចុះពិនិត្យទីតាំងប្រកួត និងទីតាំងរៀបចំពិធីផ្ទាល់ នៅតាមបណ្តោយដងទន្លេមុខសាលាខេត្ត ដើម្បីពិនិត្យមើលការរៀបចំហេដ្ឋារចនាសម្ព័ន្ធ បច្ចេកទេស និងការរៀបចំស្តង់ផ្សេងៗ ឱ្យបានរួចរាល់ជាស្រេច មុនថ្ងៃព្រឹត្តិការណ៍ផ្លូវការចូលមកដល់។

​សូមបញ្ជាក់ផងដែរថា ព្រឹត្តិការណ៍ប្រណាំងទូក «ង» ខេត្តព្រៃវែង ឆ្នាំ២០២៦ នឹងប្រព្រឹត្តទៅរយៈពេល ២ថ្ងៃ គឺនៅថ្ងៃទី២៤-២៥ ខែតុលា ឆ្នាំ២០២៦ ខាងមុខនេះ ដោយមានការប្រកួតប្រជែងទូក «ង» មកពីតាមបណ្តាក្រុង-ស្រុក មន្ទីរ-អង្គភាព និងសប្បុរសជន ព្រមទាំងមានការសម្តែងសិល្បៈ និងការតាំងពិព័រណ៍ផលិផលផ្សេងៗផងដែរ៕អត្ថបទការិ.ព័ត៌មាន លោក ឃិន ជុន