អនុគណៈកម្មការពិព័រណ៌ សិល្បៈ និងតន្ត្រី បើកកិច្ចប្រជុំរៀបចំពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៦ ក្នុងខេត្តតាកែវ

ខេត្តតាកែវ៖ នាព្រឹកថ្ងៃអង្គារ ទី៦ ខែតុលា ឆ្នាំ២០២៦ លោក អម សុភា អភិបាលរងខេត្ត និងជាប្រធានអនុគណៈកម្មការពិព័រណ៌ សិល្បៈ និងតន្ត្រី ក្នុងការរៀបចំការប្រណាំងទូក តំណាងដ៏ខ្ពង់ខ្ពស់ ឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ បានអញ្ជើញជាអធិបតីភាពក្នុងកិច្ចប្រជុំដឹកនាំអនុគណៈកម្មការពិព័រណ៌ សិល្បៈ និងតន្ត្រី ដើម្បីរៀបចំការប្រណាំងទូក បណ្តែតប្រទីប និងសំពះព្រះខែ អកអំបុក ប្រចាំខេត្តតាកែវ នាពេលខាងមុខនេះ។

កិច្ចប្រជុំនេះបានប្រព្រឹត្តទៅនៅសាលប្រជុំតូចរដ្ឋបាលខេត្តតាកែវ ដោយមានការចូលរួមពី៖
លោក នាយករងរដ្ឋបាលសាលាខេត្ត
លោក នាយកទីចាត់ការផែនការ និងវិនិយោគខេត្ត
លោក លោកស្រី អភិបាលរងក្រុង-ស្រុក
លោក លោកស្រី ប្រធាន និងអនុប្រធានមន្ទីរ-សាខាជំនាញជុំវិញខេត្តដែលពាក់ព័ន្ធ។

មានប្រសាសន៍ក្នុងឱកាសនោះ លោក អម សុភា អភិបាលរងខេត្ត បានគូសបញ្ជាក់ថា ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក គឺជាពិធីបុណ្យប្រពៃណីជាតិដ៏ធំមួយ ដែលប្រជាពលរដ្ឋទន្ទឹងរង់ចាំ។ ដូចនេះ ដើម្បីឱ្យព្រឹត្តិការណ៍ឆ្នាំ២០២៦នេះ ប្រព្រឹត្តទៅដោយរលូន គណៈកម្មការទាំងអស់ត្រូវយកចិត្តទុកដាក់ខ្ពស់លើការងាររៀបចំសណ្តាប់ធ្នាប់ សុវត្ថិភាព អនាម័យ និងបរិស្ថាន ជាពិសេសការបង្កលក្ខណៈងាយស្រួលដល់បងប្អូនប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិមកកម្សាន្តឱ្យបានសប្បាយរីករាយ។

ក្នុងកិច្ចប្រជុំនេះ អង្គប្រជុំបានពិភាក្សា និងពិនិត្យលើការងារសំខាន់ៗមួយចំនួនរួមមាន៖
ការរៀបចំស្តង់ពិព័រណ៌៖ រៀបចំឱ្យមានការដាក់តាំងបង្ហាញផលិតផលក្នុងស្រុក ផលិតផលសហគ្រាសធុនតូច មធ្យម និងម្ហូបអាហារប្រចាំខេត្ត ដើម្បីលើកស្ទួយសេដ្ឋកិច្ចមូលដ្ឋាន។
កម្មវិធីសិល្បៈ និងតន្ត្រី៖ ការរៀបចំឆាកតន្ត្រីសម័យ និងការសម្តែងសិល្បៈវប្បធម៌បុរាណ-ប្រពៃណី ដើម្បីបង្កើតបរិយាកាសគគ្រឹកគគ្រេងនាពេលរាត្រី។
សន្តិសុខ និងសណ្តាប់ធ្នាប់៖ កិច្ចសហការជាមួយកងកម្លាំងប្រដាប់អាវុធក្នុងការសម្រួលចរាចរណ៍ ការពារសុវត្ថិភាពជូនមហាជន និងការរៀបចំទីតាំងចំណតយានយន្តឱ្យបានសមរម្យ។

ជាទីបញ្ចប់ លោកអភិបាលរងខេត្ត បានណែនាំដល់មន្ទីរ-អង្គភាពពាក់ព័ន្ធ និងរដ្ឋបាលក្រុង-ស្រុកទាំងអស់ ត្រូវបន្តសហការគ្នាឱ្យបានជិតស្និទ្ធ រៀបចំផែនការសកម្មភាពជាក់ស្តែងតាមផ្នែកនីមួយៗ និងអនុវត្តភារកិច្ចដែលបានប្រគល់ជូនប្រកបដោយស្មារតីទទួលខុសត្រូវខ្ពស់ ដើម្បីឱ្យព្រឹត្តិការណ៍នេះទទួលបានជោគជ័យ និងបង្កើតបានជាការចងចាំដ៏ល្អសម្រាប់ខេត្តតាកែវ៕អត្ថបទការិ.ព័ត៌មាន លោក ឃិន ជុន