មន្ទីរអប់រំ យុវជន និងកីឡាខេត្តតាកែវ បើកវគ្គសិក្ខាសាលាស្តីពី «ការអនុវត្តម៉ោងមុខវិជ្ជាអប់រំសុខភាព»
[ខេត្តតាកែវ]៖ នាព្រឹកថ្ងៃពុធ ១១រោច ខែភទ្របទ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី៧ ខែតុលា ឆ្នាំ២០២៦ លោក ញឹម យុទ្ធា អនុប្រធានមន្ទីរអប់រំ យុវជន និងកីឡាខេត្តតាកែវ តំណាង លោក ឡោ វីរិទ្ធិ ប្រធានមន្ទីរអប់រំ យុវជន និងកីឡាខេត្ត បានអញ្ជើញជាអធិបតីក្នុងពិធីបើក «វគ្គសិក្ខាសាលាស្តីពី ការអនុវត្តម៉ោងមុខវិជ្ជាអប់រំសុខភាព» នៅសាលប្រជុំធំមន្ទីរអប់រំ យុវជន និងកីឡាខេត្តតាកែវ។
ពិធីនេះមានការអញ្ជើញចូលរួមពីតំណាងការិយាល័យអប់រំ យុវជន និងកីឡានៃរដ្ឋបាលក្រុង-ស្រុក ព្រមទាំងលោកនាយក លោកស្រីនាយិកាអនុវិទ្យាល័យទូទាំងខេត្ត សរុបចំនួន ៨៦ នាក់។
គោលបំណងចម្បងនៃវគ្គសិក្ខាសាលា៖
១. ពង្រឹងការបង្រៀនមុខវិជ្ជាអប់រំសុខភាព៖ តម្រង់ទិស និងបង្កើនសមត្ថភាពគ្រប់គ្រង ការរៀបចំផែនការបង្រៀនឱ្យចំទិសដៅ តាមការណែនាំរបស់ក្រសួងអប់រំ យុវជន និងកីឡា។
២. លើកកម្ពស់សុខភាព និងអនាម័យសិក្សា៖ បញ្ជ្រាបចំណេះដឹងអំពីសុខភាព សុខភាពសិក្ខាកាម អនាម័យខ្លួនប្រាណ សុខភាពផ្លូវចិត្ត និងការការពារជំងឺឆ្លងផ្សេងៗដល់សិស្សានុសិស្សនៅតាមគ្រឹះស្ថានសិក្សា។
៣. បង្កើនកិច្ចសហការ៖ ពង្រឹងទំនាក់ទំនង និងការសម្របសម្រួលរវាងការិយាល័យអប់រំ យុវជន និងកីឡាក្រុង-ស្រុក និងគណៈគ្រប់គ្រងសាលារៀន ក្នុងការតាមដាន វាយតម្លៃ និងជម្រុញការអនុវត្តម៉ោងសិក្សាអប់រំសុខភាពឱ្យមានប្រសិទ្ធភាពខ្ពស់។
នៅក្នុងឱកាសនោះ លោក ញឹម យុទ្ធា បានផ្តាំផ្ញើ និងលើកទឹកចិត្តដល់លោក លោកស្រី ដែលជាតំណាងការិយាល័យអប់រំ និងនាយក-នាយិកាអនុវិទ្យាល័យទាំងអស់ ឱ្យយកចិត្តទុកដាក់ត្រង់ត្រាប់ស្តាប់ការបកស្រាយរបស់វាគ្មិន និងផ្លាស់ប្តូរពិសោធន៍គ្នាទៅវិញទៅមក ដើម្បីនាំយកចំណេះដឹង និងវិធីសាស្ត្រថ្មីៗទាំងនេះ ទៅអនុវត្តឱ្យទទួលបានលទ្ធផលល្អប្រសើរនៅតាមគ្រឹះស្ថានសិក្សារៀងៗខ្លួន។អត្ថបទការិ.ព័ត៌មាន លោក ឃិន ជុន
No comments:
Post a Comment