ឯកឧត្តម វ៉ី សំណាង អញ្ជើញជាអធិបតីភាពក្នុងពិធីប្រកាសចូលកាន់មុខតំណែងប្រធានគណៈកម្មាធិការគណបក្ស និងប្រធានយុវជនគណបក្សប្រជាជនកម្ពុជា ស្រុកអង្គរបូរី

តាកែវ៖ នាវេលាម៉ោង ១១:៣០ នាទីព្រឹក ថ្ងៃទី១៩ ខែតុលា ឆ្នាំ២០២៦ ឯកឧត្តម វ៉ី សំណាង ប្រធានគណៈកម្មាធិការគណបក្សប្រជាជនកម្ពុជា ខេត្តតាកែវ បានអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីប្រកាសចូលកាន់មុខតំណែង លោក កង អាណាន់ ជាប្រធានគណៈកម្មាធិការគណបក្សស្រុក និងជាប្រធានយុវជនគណបក្ស នៃគណៈកម្មាធិការគណបក្សប្រជាជនកម្ពុជា ស្រុកអង្គរបូរី ខេត្តតាកែវ។

ពិធីនេះក៏មានការអញ្ជើញចូលរួមពីសំណាក់ ឯកឧត្តម លោកជំទាវ សមាជិក សមាជិកាគណៈកម្មាធិការបក្សខេត្ត ក្រុមការងាររាជរដ្ឋាភិបាលចុះមូលដ្ឋានស្រុក មន្ត្រីគណបក្សស្រុក-ឃុំ និងតំណាងយុវជនគណបក្សជាច្រើនរូប។

នៅក្នុងឱកាសដ៏អធិកអធមនោះ ឯកឧត្តម វ៉ី សំណាង បានថ្លែងនូវការកោតសរសើរ និងវាយតម្លៃខ្ពស់ចំពោះស្មារតីខិតខំប្រឹងប្រែងរបស់ថ្នាក់ដឹកនាំ មន្ត្រីគណបក្ស និងសមាជិក-សមាជិកាទាំងអស់នៅក្នុងស្រុកអង្គរបូរី នាពេលកន្លងមក។

ជាមួយគ្នានេះ ឯកឧត្តមប្រធានគណៈកម្មាធិការគណបក្សខេត្ត បានផ្តល់នូវអនុសាសន៍ និងមតិផ្តាំផ្ញើសំខាន់ៗដល់ លោក កង អាណាន់ ដែលទើបទទួលបានការទុកចិត្ត និងទទួលតំណែងថ្មី ព្រមទាំងថ្នាក់ដឹកនាំគណបក្សស្រុក រួមមាន៖

១. ពង្រឹងកម្លាំងសាមគ្គីភាព និងឯកភាពផ្ទៃក្នុង៖ ត្រូវរក្សាសាមគ្គីភាពផ្ទៃក្នុងឱ្យបានរឹងមាំ ដោយឈរលើគោលការណ៍លទ្ធិប្រជាធិបតេយ្យនគរូបនីយកម្ម និងការដឹកនាំតាមលក្ខន្តិកៈរបស់គណបក្ស ដើម្បីរួមគ្នាបម្រើជាតិ និងប្រជាជនឱ្យកាន់តែមានប្រសិទ្ធភាព។

២. យកចិត្តទុកដាក់លើសុខទុក្ខ និងការផ្តល់សេវាជូនប្រជាពលរដ្ឋ៖ ត្រូវបន្តចុះមូលដ្ឋានឱ្យបានជាប់ជាប្រចាំ ដើមបីស្វែងយល់ និងដោះស្រាយបញ្ហាប្រឈម សំណូមពរ និងកង្វល់ផ្សេងៗរបស់បងប្អូនប្រជាពលរដ្ឋនៅតាមមូលដ្ឋានឱ្យបានទាន់ពេលវេលា និងតម្លាភាព។

៣. ពង្រឹង និងពង្រីកកម្លាំងយុវជន៖ ត្រូវយកចិត្តទុកដាក់លើការកសាង និងបណ្តុះបណ្តាលសមត្ថភាព ក៏ដូចជាផ្តល់ឱកាសដល់យុវជនគណបក្ស ដែលជាកម្លាំងបន្តវេនដ៏សំខាន់ ឱ្យមានស្មារតីស្នេហាជាតិ ស្មោះត្រង់ និងរួមចំណែកយ៉ាងសកម្មក្នុងការអភិវឌ្ឍសង្គមជាតិ។

៤. រួមគ្នារក្សាសន្តិសុខ និងសណ្តាប់ធ្នាប់៖ ត្រូវសហការយ៉ាងជិតស្និទ្ធជាមួយអាជ្ញាធរមានសមត្ថកិច្ច និងកងកម្លាំងប្រដាប់អាវុធ ដើម្បីថែរក្សាសន្តិសុខ សុវត្ថិភាព និងសណ្តាប់ធ្នាប់សាធារណៈជូនប្រជាពលរដ្ឋ ស្របតាមគោលនយោបាយ «ភូមិ-ឃុំ-សង្កាត់ មានសុវត្ថិភាព»។

ជាទីបញ្ចប់ ឯកឧត្តម វ៉ី សំណាង បានជឿជាក់យ៉ាងមុតមាំថា លោក កង អាណាន់ រួមជាមួយគណៈកម្មាធិការគណបក្សស្រុកអង្គរបូរី នឹងបន្តរួមបេះដូងតែមួយ ខិតខំប្រឹងប្រែងបំពេញភារកិច្ចឱ្យទទួលបានជោគជ័យ និងទទួលបានការគាំទ្រកាន់តែខ្លាំងក្លាពីសំណាក់ប្រជាពលរដ្ឋនៅក្នុងមូលដ្ឋាន៕អត្ថបទការិ.ព័ត៌មាន លោក ឃិន ជុន