រដ្ឋបាលខេត្តព្រៃវែង រៀបចំវគ្គបណ្តុះបណ្តាលស្តីពីការប្រមូលទិន្នន័យមូលដ្ឋានឃុំ សង្កាត់ (CDB) ឆ្នាំ២០២៦

ព្រៃវែង៖ រសៀលថ្ងៃទី១៩ ខែតុលា ឆ្នាំ២០២៦ ឯកឧត្តម សួន សុម៉ាលីន អភិបាលនៃគណៈអភិបាលខេត្តព្រៃវែង រួមជាមួយឯកឧត្តម រិន វីរៈ ទីប្រឹក្សាផ្ទាល់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា រដ្ឋលេខាធិការក្រសួងផែនការ និងជាប្រធានក្រុមប្រឹក្សាភិបាលវិទ្យាស្ថានជាតិស្ថិតិ និងឯកឧត្តម ប៉េង ពោធិ៍សា អភិបាលនៃគណៈអភិបាលខេត្តស្វាយរៀង បានអញ្ជើញជាអធិបតីដ៏ខ្ពង់ខ្ពស់ក្នុង វគ្គបណ្តុះបណ្តាលស្តីពីការប្រមូលទិន្នន័យមូលដ្ឋានឃុំ សង្កាត់ (CDB) ឆ្នាំ២០២៦។

ពិធីនេះបានប្រព្រឹត្តទៅនៅសាលប្រជុំពហុបំណង (B) នៃសាលាខេត្តព្រៃវែង ដោយមានការអញ្ជើញចូលរួមពី ថ្នាក់ដឹកនាំ និងមន្ត្រីនៃមន្ទីរផែនការរាជធានី-ខេត្តចំនួន ១២, អភិបាលនៃគណៈអភិបាលក្រុង-ស្រុកទាំង ១៣, មេឃុំ ចៅសង្កាត់ ក៏ដូចជាអ្នកពាក់ព័ន្ធសរុបចំនួន ១១០រូប។

ថ្លែងនៅក្នុងឱកាសនោះ ថ្នាក់ដឹកនាំអធិបតីបានគូសបញ្ជាក់អំពីសារៈសំខាន់មិនអាចខ្វះបាននៃទិន្នន័យមូលដ្ឋានឃុំ សង្កាត់ (CDB) ដែលជាឧបករណ៍ និងជាប្រភពព័ត៌មានយ៉ាងសំខាន់សម្រាប់ការរៀបចំផែនការអភិវឌ្ឍន៍ ការកំណត់គោលនយោបាយ និងការបែងចែកធនធានឱ្យចំគោលដៅ ប្រកបដោយសមធម៌ និងប្រសិទ្ធភាព ទាំងថ្នាក់ជាតិ និងថ្នាក់ក្រោមជាតិ។

ជាមួយគ្នានេះ ឯកឧត្តមអធិបតីក៏បានផ្តល់អនុសាសន៍ និងផ្តាំផ្ញើដល់សិក្ខាកាមទាំងអស់ដូចខាងក្រោម៖
១. យកចិត្តទុកដាក់ត្រង់ត្រាប់ស្តាប់៖ ក្រេបជញ្ជក់ចំណេះដឹង បច្ចេកទេស និងបទពិសោធន៍ពីគ្រូឧទ្ទេស ដើម្បីយកទៅអនុវត្តការងារប្រមូលទិន្នន័យឱ្យមានប្រសិទ្ធភាពខ្ពស់។

២. ធានាភាពត្រឹមត្រូវ និងសុក្រឹតភាព៖ ការចុះប្រមូលទិន្នន័យត្រូវធ្វើឡើងដោយផ្អែកលើទិដ្ឋភាពជាក់ស្តែង តម្លាភាព និងភាពត្រឹមត្រូវ ដើម្បីឱ្យទិន្នន័យដែលទទួលបានមានតម្លៃ និងឆ្លុះបញ្ចាំងពីស្ថានភាពពិតប្រាកដនៅមូលដ្ឋាន។

៣. ពង្រឹងកិច្ចសហការ៖ អាជ្ញាធរដែនដីគ្រប់លំដាប់ថ្នាក់ មន្ត្រីជំនាញ និងភាគីពាក់ព័ន្ធទាំងអស់ ត្រូវបន្តសហការគ្នាឱ្យបានជិតស្និទ្ធ ដើម្បីធានាឱ្យដំណើរការប្រមូលទិន្នន័យមូលដ្ឋានឃុំ សង្កាត់ ឆ្នាំ២០២៦ នេះ ប្រព្រឹត្តទៅដោយរលូន និងសម្រេចបានលទ្ធផលតាមផែនការគ្រោងទុក។

សូមបញ្ជាក់ថា វគ្គបណ្តុះបណ្តាលនេះរៀបចំឡើងក្នុងគោលបំណងពង្រឹងសមត្ថភាពមន្ត្រីជំនាញ និងអាជ្ញាធរមូលដ្ឋាន ឱ្យយល់ដឹងកាន់តែច្បាស់អំពីនីតិវិធី បច្ចេកទេស និងការប្រើប្រាស់ឧបករណ៍ប្រមូលទិន្នន័យ ឱ្យស្របតាមស្តង់ដារកំណត់ ឆ្លើយតបទៅនឹងតម្រូវការអភិវឌ្ឍន៍សង្គម-សេដ្ឋកិច្ចនាពេលបច្ចុប្បន្ន និងទៅអនាគត។អត្ថបទការិ.ព័ត៌មាន លោក ឃិន ជុន