ឯកឧត្តម វ៉ី សំណាង អភិបាលខេត្តតាកែវ អញ្ជើញជាអធិបតីក្នុងពិធីបើកបវេសនកាលឆ្នាំសិក្សាថ្មី ២០២៦-២០២៧ និងប្រគល់ប័ណ្ណសរសើរជូនសិស្សពូកែ នៅសាលា ញូខាស្សឹលកម្ពុជា សាខាទី៣

 

ឯកឧត្តម វ៉ី សំណាង អភិបាលខេត្តតាកែវ អញ្ជើញជាអធិបតីក្នុងពិធីបើកបវេសនកាលឆ្នាំសិក្សាថ្មី ២០២៦-២០២៧ និងប្រគល់ប័ណ្ណសរសើរជូនសិស្សពូកែ នៅសាលា ញូខាស្សឹលកម្ពុជា សាខាទី៣

(ខេត្តតាកែវ)៖ ដើម្បីលើកកម្ពស់វិស័យអប់រំ និងបណ្តុះបណ្តាលទំពាំងស្នងឫស្សីឱ្យក្លាយជាធនធានមនុស្សដ៏មានសក្តានុពលសម្រាប់ជាតិ នៅព្រឹកថ្ងៃទី០៤ ខែកញ្ញា ឆ្នាំ២០២៦ នេះ សាលា ញូខាស្សឹលកម្ពុជា (Newcastle Cambodia School) សាខាទី៣ ស្ថិតក្នុងក្រុងដូនកែវ ខេត្តតាកែវ បានរៀបចំពិធីបើកបវេសនកាលឆ្នាំសិក្សាថ្មី ២០២៦-២០២៧ អមដោយពិធីប្រគល់ប័ណ្ណសរសើរជូនដល់សិស្សពូកែប្រចាំឆ្នាំ ប្រកបដោយបរិយាកាសមហោឡារិក និងគគ្រឹកគគ្រេង។

ពិធីនេះបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ ឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ ព្រមទាំងមានការអញ្ជើញចូលរួមពីសំណាក់ លោក លោកស្រី អភិបាលរងខេត្ត រដ្ឋបាលក្រុងដូនកែវ ប្រធាន-អនុប្រធានមន្ទីរ និងអង្គភាពពាក់ព័ន្ធ អាជ្ញាធរមូលដ្ឋាន គណៈគ្រប់គ្រងសាលា លោកនាយក-នាយករង លោកគ្រូ-អ្នកគ្រូ សិស្សានុសិស្ស និងមាតាបិតា អាណាព្យាបាលសិស្សយ៉ាងច្រើនកុះករ។

ក្នុងឱកាសដ៏ថ្លៃថ្លានោះ ឯកឧត្តម វ៉ី សំណាង បានសម្តែងនូវការកោតសរសើរ និងថ្លែងអំណរគុណយ៉ាងជ្រាលជ្រៅចំពោះគណៈគ្រប់គ្រង លោកគ្រូ-អ្នកគ្រូទាំងអស់ ដែលបានបូជាកម្លាំងកាយចិត្ត ចំណេះដឹង និងបទពិសោធន៍ ក្នុងការលត់ដំ បណ្តុះបណ្តាលសិស្សានុសិស្សឱ្យប្រកបដោយគុណភាព និងសីលធម៌ខ្ពស់។ ឯកឧត្តមបានគូសបញ្ជាក់ថា «ការអប់រំ គឺជាគ្រឹះយ៉ាងរឹងមាំ និងជាកាតាលីករដ៏សំខាន់បំផុត ក្នុងការអភិវឌ្ឍសង្គមជាតិឱ្យមានការរីកចម្រើនរុងរឿង និងប្រកបដោយចីរភាព»។

ជាពិសេស ឯកឧត្តមអភិបាលខេត្ត ក៏បានលើកឡើងនូវសុភាសិតបុរាណខ្មែរមួយឃ្លាដ៏មានអត្ថន័យថា៖ «បុរសស្រស់និងវិជ្ជា នារីសោភាស្រស់និងកិរិយា» ដោយបានដាស់តឿន និងលើកទឹកចិត្តដល់ក្មួយៗយុវជន យុវនារីទាំងអស់ ឱ្យខិតខំប្រឹងប្រែងរៀនសូត្រ ក្រសោបយកចំណេះដឹង និងបណ្តុះស្មារតីតស៊ូ ព្រោះចំណេះវិជ្ជា និងគុណធម៌ គឺជា «សម្រស់ពិតប្រាកដពីខាងក្នុង» ដែលមានតម្លៃអន័គ្ឃ និងស្ថិតស្ថេរជាអមតៈ មិនមែនអាស្រ័យលើតែរូបសម្បត្តិខាងក្រៅនោះឡើយ។

ឯកឧត្តមបានបន្ថែមថា ប័ណ្ណសរសើរដែលក្មួយៗទទួលបាននៅថ្ងៃនេះ គឺជាផ្លែផ្កានៃការខិតខំប្រឹងប្រែង ប្រកបដោយការយកចិត្តទុកដាក់ និងការតស៊ូរៀនសូត្ររបស់ក្មួយៗផ្ទាល់ រួមផ្សំនឹងការលះបង់ បង្ហាត់បង្រៀនយ៉ាងយកចិត្តទុកដាក់ពីសំណាក់លោកគ្រូ-អ្នកគ្រូ និងការជួយជ្រោមជ្រែងមើលថែទាំយ៉ាងយកចិត្តទុកដាក់ពីមាតាបិតានៅឯផ្ទះ។

ជាទីបញ្ចប់ ឯកឧត្តមអភិបាលខេត្ត បានសម្តែងនូវការអបអរសាទរយ៉ាងកក់ក្តៅចំពោះសិស្សពូកែទាំងអស់ និងបានជូនពរឱ្យសិស្សានុសិស្សគ្រប់រូប ទទួលបានជោគជ័យ និងលទ្ធផលកាន់តែប្រសើរថែមទៀត ក្នុងឆ្នាំសិក្សាថ្មី ២០២៦-២០២៧ នេះ ដើម្បីក្លាយជាសិស្សគំរូ និងជាទំពាំងស្នងឫស្សីដ៏ល្អបរិសុទ្ធរបស់ប្រទេសជាតិ៕