រដ្ឋបាលខេត្តតាកែវ រៀបចំកិច្ចប្រជុំគណៈកម្មការ ដើម្បីត្រៀមរៀបចំពិធីប្រណាំងទូក បណ្តែតប្រទីប សំពះព្រះខែ និងអកអំបុក ថ្នាក់ខេត្ត ឆ្នាំ២០២៦

តាកែវ៖ នាព្រឹកថ្ងៃអង្គារ ៩កើត ខែអស្សុជ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២០ ខែតុលា ឆ្នាំ២០២៦ ឯកឧត្តម វី សំណាង អភិបាល នៃគណៈអភិបាលខេត្តតាកែវ បានអញ្ជើញជាអធិបតីភាពដ៏ខ្ពង់ខ្ពស់ ក្នុងកិច្ចប្រជុំគណៈកម្មការ និងអនុគណៈកម្មការនានា នៃគណៈកម្មការរៀបចំពិធីប្រណាំងទូកនៅខេត្តតាកែវ ប្រចាំឆ្នាំ២០២៦។

កិច្ចប្រជុំនេះបានប្រព្រឹត្តទៅនៅសាលប្រជុំធំរដ្ឋបាលខេត្តតាកែវ ដោយមានការអញ្ជើញចូលរួមពីសំណាក់ថ្នាក់ដឹកនាំខេត្ត កងកម្លាំងប្រដាប់អាវុធ អាជ្ញាធរដែនដី និងតំណាងមន្ទីរ-អង្គភាពពាក់ព័ន្ធជុំវិញខេត្ត។

មានប្រសាសន៍ក្នុងឱកាសនោះ ឯកឧត្តម វី សំណាង អភិបាលខេត្ត បានណែនាំ និងផ្តាំផ្ញើដល់គណៈកម្មការ និងអនុគណៈកម្មការពាក់ព័ន្ធទាំងអស់ ត្រូវ៖
សហការ និងទទួលខុសត្រូវខ្ពស់៖ បង្កើនស្មារតីទទួលខុសត្រូវ និងកិច្ចសហការជិតស្និទ្ធរវាងគ្រប់អនុគណៈកម្មការទាំងអស់ ដើម្បីបំពេញភារកិច្ចដែលបានប្រគល់ជូនឱ្យបានល្អប្រសើរ និងតាមផែនការកំណត់។

ពង្រឹងសន្តិសុខ និងសុវត្ថិភាព៖ កងកម្លាំងប្រដាប់អាវុធ និងអាជ្ញាធរមានសមត្ថកិច្ច ត្រូវយកចិត្តទុកដាក់ខ្ពស់លើការការពារសន្តិសុខ របៀបរៀបរយសាធារណៈ សណ្តាប់ធ្នាប់ចរាចរណ៍ និងសុវត្ថិភាពជូនដល់កីឡាករប្រណាំងទូក ប្រជាពលរដ្ឋ និងភ្ញៀវទេសចរជាតិ-អន្តរជាតិដែលអញ្ជើញមកកម្សាន្ត។

រៀបចំសោភ័ណភាព និងបរិស្ថាន៖ ត្រូវយកចិត្តទុកដាក់លើការលម្អភ្លើងពណ៌ ការថែរក្សាអនាម័យ បរិស្ថាន និងការរៀបចំស្តង់ពិព័រណ៍ ឆាកតន្ត្រី និងការបណ្តែតប្រទីប ឱ្យមានភាពទាក់ទាញ ស្អាតបាត និងមានសោភ័ណភាពខ្ពស់។

សម្រួលដល់កីឡាករ និងសាធារណជន៖ ត្រូវរៀបចំទីតាំងស្នាក់នៅ អាហារូបត្ថម្ភ និងការថែទាំសុខភាពជូនដល់កីឡាករឱ្យបានល្អ និងរៀបចំកន្លែងទស្សនាជូនប្រជាពលរដ្ឋឱ្យបានទូលំទូលាយ និងមានរបៀបរៀបរយ។

ឯកឧត្តមអភិបាលខេត្ត បានបញ្ជាក់បន្ថែមថា ការត្រៀមលក្ខណៈសម្បត្តិគ្រប់ជ្រុងជ្រោយនេះ គឺដើម្បីធានាឱ្យដំណើរការប្រារព្ធពិធីប្រណាំងទូក បណ្តែតប្រទីប សំពះព្រះខែ និងអកអំបុក ថ្នាក់ខេត្តតាកែវ ដើម្បីអបអរសាទរព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ប្រពៃណីជាតិ ខាងមុខនេះ ប្រព្រឹត្តទៅដោយរលូន ជោគជ័យ មានសុវត្ថិភាព និងបង្កើតបានជាបរិយាកាសសប្បាយរីករាយជូនដល់សាធារណជនទូទាំងខេត្ត៕

អត្ថបទការិ.ព័ត៌មាន លោក ឃិន ជុន