ឯកឧត្តម សួន សុម៉ាលីន អភិបាលខេត្តព្រៃវែង និងលោកជំទាវ ចូលរួមកាន់បិណ្ឌវេនទី១៣ និងនាំយកបច្ច័យជាង ២២លានរៀល ប្រគេនវត្តរោងដំរី

ខេត្តព្រៃវែង៖ នៅព្រឹកថ្ងៃសុក្រ ទី៩ ខែតុលា ឆ្នាំ២០២៦ ឯកឧត្តម សួន សុម៉ាលីន អភិបាល នៃគណៈអភិបាលខេត្តព្រៃវែង និងលោកជំទាវ ជុន បូរ៉ានី រួមជាមួយថ្នាក់ដឹកនាំរដ្ឋបាលខេត្ត មន្ត្រីរាជការ និងកងកម្លាំងប្រដាប់អាវុធ បានអញ្ជើញចូលរួមកាន់បិណ្ឌវេនទី១៣ នៃពិធីបុណ្យភ្ជុំបិណ្ឌ ដែលជាពិធីបុណ្យប្រពៃណីជាតិដ៏ធំមួយរបស់ពុទ្ធសាសនិកខ្មែរ នៅវត្តរោងដំរី ស្ថិតក្នុងក្រុងព្រៃវែង ខេត្តព្រៃវែង។

ក្នុងឱកាសដ៏ថ្លៃថ្លានេះ ឯកឧត្តម អភិបាលខេត្ត និងលោកជំទាវ ព្រមទាំងថ្នាក់ដឹកនាំ បានរៀបចំប្រគេនទេយ្យទាន និងគ្រឿងឧបភោគបរិភោគផ្សេងៗជាច្រើនដល់ព្រះសង្ឃ និងបានវេរប្រគេនភត្តាហារ ព្រមទាំងរៀបចំពិធីបង្សុកូល ដើម្បីឧទ្ទិសកុសលផលបុណ្យ ជូនដល់ញាតិកាទាំងប្រាំពីរសណ្ដាន ដែលបានចែកឋានទៅកាន់លោកខាងមុខ។ ជាមួយគ្នានោះដែរ ក៏បានឧទ្ទិសកុសលជូនដល់ដួងវិញ្ញាណក្ខន្ធ វីរកងទ័ព និងបុព្វបុរសខ្មែរ ដែលបានបូជាសាច់ស្រស់ ឈាមស្រស់ និងជីវិត ក្នុងការការពារបូរណភាពទឹកដី និងសន្តិភាពជូនមាតុភូមិ។

ឆ្លៀតក្នុងឱកាសដ៏ប្រពៃនេះដែរ ឯកឧត្តម សួន សុម៉ាលីន និងលោកជំទាវ រួមជាមួយថ្នាក់ដឹកនាំរដ្ឋបាលខេត្ត ក៏បាននាំយកនូវថវិការួមគ្នាចំនួន ២២.០២០.០០០ រៀល (ម្ភៃពីរលាន ពីរម៉ឺនរៀល) ប្រគេនដល់ព្រះសង្ឃគង់ចាំវស្សានៅវត្តរោងដំរី សម្រាប់ចូលរួមកសាងសមិទ្ធផលនានាក្នុងអារាម ដើម្បីទ្រទ្រង់ និងលើកស្ទួយវិស័យព្រះពុទ្ធសាសនាឱ្យកាន់តែរីកចម្រើនតទៅមុខបន្ថែមទៀត៕អត្ថបទការិ.ព័ត៌មាន លោក ឃិន ជុន