ឯកឧត្តម ហុី ធួក អភិបាលរងខេត្តព្រៃវែង អញ្ជើញជាអធិបតីក្នុងពិធី «ជជែកដេញដោលយុវជនថ្នាក់ខេត្ត» វគ្គផ្ដាច់ព្រ័ត្រ ឆ្នាំ២០២៦

ខេត្តព្រៃវែង៖ នាព្រឹកថ្ងៃទី៩ ខែតុលា ឆ្នាំ២០២៦ ពិធី «ជជែកដេញដោលយុវជនថ្នាក់ខេត្ត» វគ្គផ្ដាច់ព្រ័ត្រ ប្រចាំឆ្នាំ២០២៦ ត្រូវបានរៀបចំឡើងយ៉ាងអធិកអធម នៅសាលប្រជុំមន្ទីរអប់រំ យុវជន និងកីឡាខេត្តព្រៃវែង ក្រោមអធិបតីភាព ឯកឧត្តម ហុី ធួក អភិបាលរងនៃគណៈអភិបាលខេត្តព្រៃវែង តំណាងដ៏ខ្ពង់ខ្ពស់ ឯកឧត្តម សួន សុម៉ាលីន អភិបាលនៃគណៈអភិបាលខេត្ត។

កម្មវិធីនេះត្រូវបានរៀបចំឡើងក្នុងគោលបំណងចម្បង ដើម្បីសម្រាំង និងជ្រើសរើសបេក្ខជន/ក្រុមជ័យលាភីលេខ១ ដែលមានសមត្ថភាព និងទេពកោសល្យឆ្នើមប្រចាំខេត្តព្រៃវែង ធ្វើជាតំណាងខេត្ត ទៅចូលរួមប្រកួតប្រជែងក្នុង «កម្មវិធីជជែកដេញដោលយុវជនថ្នាក់ជាតិ ឆ្នាំ២០២៧» ដែលរៀបចំដោយក្រសួងអប់រំ យុវជន និងកីឡា។

មានប្រសាសន៍សំណេះសំណាល និងបើកកម្មវិធីនាឱកាសនោះ ឯកឧត្តម ហុី ធួក អភិបាលរងខេត្ត បានពាំនាំនូវការផ្តាំផ្ញើសួរសុខទុក្ខពី ឯកឧត្តម សួន សុម៉ាលីន អភិបាលខេត្ត ជូនដល់អង្គពិធីទាំងមូល និងបានវាយតម្លៃខ្ពស់ចំពោះមន្ទីរអប់រំ យុវជន និងកីឡាខេត្ត ដែលបានខិតខំប្រឹងប្រែងរៀបចំកម្មវិធីនេះឡើង។

ឯកឧត្តម អភិបាលរងខេត្ត បានមានប្រសាសន៍បញ្ជាក់ថា៖ «ការរៀបចំកម្មវិធីជជែកដេញដោលយុវជននេះ មិនត្រឹមតែជាការប្រកួតប្រជែងយកជ័យលាភីប៉ុណ្ណោះទេ ប៉ុន្តែគឺជាវេទិកាដ៏មានសារសំខាន់ក្នុងការបណ្តុះបណ្តាល និងពង្រឹងសមត្ថភាពយុវជនលើផ្នែកសិល្បៈនៃការនិយាយជាសាធារណៈ ការស្រាវជ្រាវ ការវិភាគ និងការគិតបែបស៊ីជម្រៅ។ លើសពីនេះ វានឹងជួយលើកកម្ពស់ភាពក្លាហាន និងទំនុកចិត្តលើខ្លួនឯងរបស់យុវជន ដើម្បីក្លាយជាទំពាំងស្នងឫស្សី និងជាសសរទ្រូងដ៏រឹងមាំក្នុងការអភិវឌ្ឍប្រទេសជាតិនាពេលអនាគត»។

ជាមួយគ្នានេះ ឯកឧត្តម ក៏បានផ្តាំផ្ញើ និងលើកទឹកចិត្តដល់បេក្ខជនទាំងអស់ឱ្យខិតខំបញ្ចេញនូវសមត្ថភាព ចំណេះដឹង និងបច្ចេកទេសដេញដោលឱ្យអស់ពីលទ្ធភាព ប្រកបដោយក្រមសីលធម៌ វិជ្ជាជីវៈ និងស្មារតីកីឡា ហើយសម្រាប់បេក្ខជនជ័យលាភីដែលត្រូវតំណាងឱ្យខេត្ត ត្រូវបន្តខិតខំដុសខាត់សមត្ថភាព និងស្រាវជ្រាវបន្ថែមទៀត ដើម្បីត្រៀមខ្លួនដណ្តើមជោគជ័យជូនខេត្តព្រៃវែង នៅក្នុងការប្រកួតថ្នាក់ជាតិ ឆ្នាំ២០២៧ ខាងមុខនេះ៕អត្ថបទការិ.ព័ត៌មាន លោក ឃិន ជុន