ឯកឧត្តម គឹម វណ្ណា អញ្ជើញចូលរួមកិច្ចប្រជុំបូកសរុបការងារខែកញ្ញា និងទិសដៅខែតុលា ឆ្នាំ២០២៦ របស់គណៈកម្មាធិការគណបក្សស្រុកពារាំង ក្រោមអធិបតីភាពដ៏ខ្ពង់ខ្ពស់ ឯកឧត្តម វង្ស ពិសេន
(ខេត្តព្រៃវែង)៖ នាថ្ងៃសៅរ៍ ៦កើត ខែអស្សុជ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១៧ ខែតុលា ឆ្នាំ២០២៦ ឯកឧត្តម គឹម វណ្ណា សមាជិកគណៈកម្មាធិការកណ្តាល គណបក្សប្រជាជនកម្ពុជា, អនុប្រធានក្រុមការងារគណបក្សប្រជាជនកម្ពុជា ចុះមូលដ្ឋានស្រុកពារាំង និងជាប្រធានក្រុមការងារគណបក្សប្រជាជនកម្ពុជា ចុះមូលដ្ឋានឃុំកំពង់ពពិល ព្រមទាំងសហការី បានអញ្ជើញចូលរួមកិច្ចប្រជុំបូកសរុបសកម្មភាពការងារគណៈកម្មាធិការគណបក្សស្រុកពារាំង ប្រចាំខែកញ្ញា និងលើកទិសដៅអនុវត្តសម្រាប់ខែតុលា ឆ្នាំ២០២៦។
កិច្ចប្រជុំនេះបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ វង្ស ពិសេន សមាជិកអចិន្ត្រៃយ៍គណៈកម្មាធិការកណ្ដាល គណបក្សប្រជាជនកម្ពុជា និងជាប្រធានក្រុមការងារគណបក្សប្រជាជនកម្ពុជា ចុះមូលដ្ឋានស្រុកពារាំង ដោយមានការអញ្ជើញចូលរួមពីសំណាក់សមាជិក សមាជិកា ក្រុមការងារចុះមូលដ្ឋាន ថ្នាក់ដឹកនាំគណបក្សស្រុក-ឃុំ និងមន្ត្រីពាក់ព័ន្ធជាច្រើនរូប។
បន្ទាប់ពីបានស្ដាប់របាយការណ៍បូកសរុបលទ្ធផលការងារប្រចាំខែកញ្ញា និងការពិភាក្សាលើទិសដៅការងារបន្ត ឯកឧត្តម នាយឧត្តមសេនីយ៍ វង្ស ពិសេន បានថ្លែងនូវការកោតសរសើរ និងវាយតម្លៃខ្ពស់ចំពោះខិតខំប្រឹងប្រែងរបស់ក្រុមការងារចុះមូលដ្ឋានគ្រប់លំដាប់ថ្នាក់ និងអាជ្ញាធរដែនដី ដែលបានយកចិត្តទុកដាក់បំពេញភារកិច្ច និងបម្រើប្រជាពលរដ្ឋនាពេលកន្លងមក។
នៅក្នុងឱកាសនោះ ឯកឧត្តមប្រធានប្រជុំ បានផ្តល់អនុសាសន៍ និងណែនាំនូវចំណុចគន្លឹះសំខាន់ៗមួយចំនួនសម្រាប់ទិសដៅអនុវត្តក្នុងខែតុលា រួមមាន៖
ពង្រឹងការងារចុះមូលដ្ឋាន៖ បន្តចុះជួបសម្តែងការគួរសម និងក្តាប់អំពីទុក្ខធុរៈ សំណូមពរ និងតម្រូវការជាក់ស្តែងរបស់ប្រជាពលរដ្ឋនៅតាមមូលដ្ឋានឱ្យបានជាប់ជាប្រចាំ។
ការផ្តល់សេវាសាធារណៈ៖ បន្តជំរុញការផ្តល់សេវារដ្ឋបាល និងសេវាសាធារណៈជូនប្រជាពលរដ្ឋឱ្យបានឆាប់រហ័ស មានប្រសិទ្ធភាព តម្លាភាព និងគ្មានការរើសអើង។
ការរក្សាសន្តិសុខ សុវត្ថិភាព៖ ពង្រឹងការអនុវត្តគោលនយោបាយ «ភូមិ-ឃុំ-សង្កាត់ មានសុវត្ថិភាព» ដើម្បីធានាបាននូវសន្តិសុខ សណ្តាប់ធ្នាប់សាធារណៈ និងបង្ការទប់ស្កាត់បទល្មើសផ្សេងៗក្នុងមូលដ្ឋាន។
ការកសាង និងពង្រឹងបក្ស៖ បន្តពង្រឹងកម្លាំងសាមគ្គីភាពផ្ទៃក្នុង និងអប់រំនយោបាយសតិអារម្មណ៍ដល់សមាជិក សមាជិកាបក្សឱ្យបានរឹងមាំ ដើម្បីត្រៀមលក្ខណៈបំពេញភារកិច្ចជូនជាតិ និងប្រជាជនកាន់តែមានប្រសិទ្ធភាពខ្ពស់។
កិច្ចប្រជុំបានបញ្ចប់ទៅដោយបរិយាកាសរីករាយ ស្និទ្ធស្នាល និងប្រកបដោយស្មារតីទទួលខុសត្រូវខ្ពស់ក្នុងការប្តេជ្ញាចិត្តអនុវត្តទិសដៅការងារខែថ្មីឱ្យទទួលបានលទ្ធផលជោគជ័យបន្ថែមទៀត។អត្ថបទការិ.ព័ត៌មាន លោក ឃិន ជុន
No comments:
Post a Comment