សម្តេចក្រឡាហោម ស ខេង អញ្ជើញសំណេះសំណាលជាមួយក្រុមការងារ និងសមាជិក សមាជិកាគណបក្សប្រជាជនកម្ពុជា ស្រុកបាណន់

ខេត្តបាត់ដំបង៖ នារសៀលថ្ងៃសៅរ៍ ៦កើត ខែអស្សុជ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១៧ ខែតុលា ឆ្នាំ២០២៦ សម្តេចក្រឡាហោម ស ខេង អនុប្រធានគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខេត្តបាត់ដំបង បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីសំណេះសំណាល និងជួបប្រជុំជាមួយក្រុមការងារ ព្រមទាំងសមាជិក សមាជិកាគណបក្សប្រជាជនកម្ពុជា នៅក្នុងស្រុកបាណន់ ខេត្តបាត់ដំបង ដែលពិធីនេះត្រូវបានប្រារព្ធធ្វើឡើងនៅស្នាក់ការគណបក្សប្រជាជនកម្ពុជាស្រុកបាណន់។

ថ្លែងនៅក្នុងឱកាសសំណេះសំណាលនាពេលនោះ សម្តេចក្រឡាហោម ស ខេង បានសម្តែងនូវការកោតសរសើរ និងវាយតម្លៃខ្ពស់ចំពោះខិតខំប្រឹងប្រែងរបស់ក្រុមការងារគណបក្សចុះមូលដ្ឋានគ្រប់លំដាប់ថ្នាក់ អាជ្ញាធរដែនដី និងកងកម្លាំងប្រដាប់អាវុធ ដែលបានរួមសហការគ្នាយ៉ាងល្អក្នុងការថែរក្សាសន្តិសុខ សុវត្ថិភាព សណ្តាប់ធ្នាប់សាធារណៈ និងការផ្តល់សេវាសាធារណៈជូនប្រជាពលរដ្ឋបានយ៉ាងល្អប្រសើរកន្លងមក។

ទន្ទឹមនឹងនេះ សម្តេចក្រឡាហោម បានផ្តល់នូវប្រសាសន៍ណែនាំ និងទិសដៅការងារសំខាន់ៗមួយចំនួនដល់ក្រុមការងារ និងសមាជិក សមាជិកាគណបក្ស រួមមាន៖

ការបន្តចុះមូលដ្ឋានជាប់ជាប្រចាំ៖ ក្រុមការងារត្រូវបន្តចុះជួបសម្តែងការគួរសម សួរសុខទុក្ខ និងក្តាប់ឲ្យបានច្បាស់នូវសុខទុក្ខ ព្រមទាំងតម្រូវការជាក់ស្តែងរបស់ប្រជាពលរដ្ឋនៅតាមមូលដ្ឋាន ដើម្បីជួយដោះស្រាយបញ្ហាប្រឈមផ្សេងៗជូនពួកគាត់ឲ្យបានទាន់ពេលវេលា និងមានប្រសិទ្ធភាព។

ការអនុវត្តគោលនយោបាយភូមិ-ឃុំ-សង្កាត់មានសុវត្ថិភាព៖ ត្រូវយកចិត្តទុកដាក់បន្តពង្រឹងការងារសន្តិសុខ សណ្តាប់ធ្នាប់សាធារណៈ ដោយលុបបំបាត់បទល្មើសផ្សេងៗដូចជា ល្បែងស៊ីសងខុសច្បាប់ បញ្ហាគ្រឿងញៀន និងអំពើចោរកម្ម ដើម្បីបង្កើនទំនុកចិត្ត និងផ្តល់ភាពសុខក្សេមក្សាន្តជូនប្រជាពលរដ្ឋ។

ការផ្តល់សេវាសាធារណៈ៖ ត្រូវបង្កើនប្រសិទ្ធភាព និងភាពស្មោះត្រង់ក្នុងការផ្តល់សេវារដ្ឋបាល និងសេវាសាធារណៈជូនប្រជាពលរដ្ឋឲ្យបានឆាប់រហ័ស តម្លាភាព និងគ្មានការរើសអើង។

ការរក្សាសាមគ្គីភាពផ្ទៃក្នុង៖ ត្រូវពង្រឹងស្មារតីសាមគ្គីភាព ឯកភាពផ្ទៃក្នុងគណបក្សឲ្យបានរឹងមាំ និងបន្តកសាងទំនាក់ទំនងល្អជាមួយប្រជាពលរដ្ឋគ្រប់មជ្ឈដ្ឋាន ដើម្បីរួមគ្នាកសាង និងអភិវឌ្ឍន៍ស្រុកបាណន់ ឱ្យកាន់តែមានការរីកចម្រើនបន្ថែមទៀត។

ពិធីសំណេះសំណាលនេះបានបញ្ចប់ទៅក្រោមបរិយាកាសស្និទ្ធស្នាល សប្បាយរីករាយ និងប្រកបដោយស្មារតីទទួលខុសត្រូវខ្ពស់៕អត្ថបទការិ.ព័ត៌មាន លោក ឃិន ជុន