ឯកឧត្តម សួន សុម៉ាលីន និងភារធារីស្ថានទូតចិន អញ្ជើញជាអធិបតីក្នុងពិធីសម្ពោធអាគារសិក្សានៅសាលាចិន-ខ្មែរ ជុងទី និងចុះសួរសុខទុក្ខប្រជាពលរដ្ឋនៅមន្ទីរពេទ្យបង្អែកស្រុកកំពង់ត្របែក

ស្រុកកំពង់ត្របែក៖ នៅព្រឹកថ្ងៃសុក្រ ១២កើត ខែអស្សុជ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២៣ ខែតុលា ឆ្នាំ២០២៦ ឯកឧត្តម សួន សុម៉ាលីន អភិបាលនៃគណៈអភិបាលខេត្តព្រៃវែង រួមជាមួយ ឯកឧត្តម ជាង ណាន ភារធារីស្ថានទូតចិនប្រចាំព្រះរាជាណាចក្រកម្ពុជា បានអញ្ជើញជាអធិបតីភាពដ៏ខ្ពង់ខ្ពស់ក្នុង «ពិធីកាត់ខ្សែបូសម្ពោធអាគារសិក្សា និងសមិទ្ធផលនានា នៅសាលារៀនចិន-ខ្មែរ ជុងទី» ស្ថិតនៅភូមិចំបក់ ឃុំប្រាសាទ ស្រុកកំពង់ត្របែក ខេត្តព្រៃវែង។

ពិធីនេះក៏មានការអញ្ជើញចូលរួមពី៖
ឯកឧត្តម លោកជំទាវ អភិបាលរងនៃគណៈអភិបាលខេត្តព្រៃវែង
ឯកឧត្តម អ្នកឧកញ៉ា ឧកញ៉ា ប្រធានត្រួតពិនិត្យសមាគមសម្ព័ន្ធខ្មែរ-ចិន នៅកម្ពុជា
លោក ប្រធានក្រុមប្រឹក្សាស្រុក និង លោក អភិបាលស្រុក
លោក លោកស្រី អភិបាលរងស្រុក នាយក-នាយករងរដ្ឋបាលសាលាស្រុក
ប្រធានការិយាល័យ-អង្គភាពទាំង១៣ នៃរដ្ឋបាលស្រុក និងអង្គភាពជុំវិញស្រុក
លោក លោកស្រី មេឃុំទាំង១៣ ព្រមទាំងគ្រួសារសម្ព័ន្ធខ្មែរ-ចិន ប្រជាពលរដ្ឋ លោកគ្រូ អ្នកគ្រូ និងសិស្សានុសិស្ស ចូលរួមសរុបប្រមាណ ១,១៧៣នាក់ (ស្រី ៩៨៧នាក់)។

ថ្លែងនៅក្នុងពិធីប្រកបដោយបរិយាកាសស្និទ្ធស្នាល និងមហោឡារិកនេះ ឯកឧត្តម សួន សុម៉ាលីន បានសម្ដែងនូវការកោតសរសើរ និងថ្លែងអំណរគុណយ៉ាងជ្រាលជ្រៅចំពោះស្ថានទូតចិនប្រចាំកម្ពុជា ក៏ដូចជាសមាគមសម្ព័ន្ធខ្មែរ-ចិន ដែលតែងតែផ្តល់កិច្ចសហប្រតិបត្តិការយ៉ាងជិតស្និទ្ធ និងចូលរួមចំណែកយ៉ាងសកម្មក្នុងការអភិវឌ្ឍវិស័យអប់រំ និងហេដ្ឋារចនាសម្ព័ន្ធនៅកម្ពុជា។

ឯកឧត្តមអភិបាលខេត្ត មានប្រសាសន៍គូសបញ្ជាក់ថា៖
«សមិទ្ធផលដែលបានសម្ពោធដាក់ឱ្យប្រើប្រាស់នាពេលនេះ មិនត្រឹមតែជាកាយវិការស្តែងចេញពីមិត្តភាពដែកថែប និងកិច្ចសហប្រតិបត្តិការត្បូងពេជ្ររវាងកម្ពុជា និងចិនប៉ុណ្ណោះទេ ប៉ុន្តែថែមទាំងជាមរតកដ៏មានតម្លៃក្នុងការលើកកម្ពស់គុណភាពអប់រំ និងបណ្តុះបណ្តាលធនធានមនុស្សសម្រាប់ក្មួយៗសិស្សានុសិស្សនៅមូលដ្ឋាននេះ ឱ្យទទួលបានចំណេះដឹងទាំងភាសាជាតិ និងភាសាចិន ដើម្បីឆ្លើយតបទៅនឹងតម្រូវការទីផ្សារពលកម្មនាពេលអនាគត។»

ទន្ទឹមនឹងនោះ ឯកឧត្តម ជាង ណាន ភារធារីស្ថានទូតចិន ក៏បានគូសបញ្ជាក់ពីការប្តេជ្ញាចិត្តយ៉ាងមុតមាំរបស់ភាគីចិន ក្នុងការបន្តគាំទ្រកម្ពុជាលើការអភិវឌ្ឍធនធានមនុស្ស និងកិច្ចសហប្រតិបត្តិការលើគ្រប់វិស័យ ដើម្បីពង្រឹងចំណងមិត្តភាពជាប្រពៃណីរវាងប្រជាជននៃប្រទេសទាំងពីរឱ្យកាន់តែរឹងមាំ និងស្ថិតស្ថេរជាអមតៈ។

នៅក្នុងឱកាសដ៏ថ្លៃថ្លានេះដែរ ឯកឧត្តមគណៈអធិបតី ក៏បានចែកជូនអំណោយមនុស្សធម៌ដល់ប្រជាពលរដ្ឋដែលមានជីវភាពខ្វះខាតចំនួន ៥០០គ្រួសារ ដោយក្នុងមួយគ្រួសារទទួលបាន៖
មី ១កេស
ឆ្នាំងដាំបាយអគ្គិសនី ១
សារ៉ុង ១
ស្ករស ១គីឡូក្រាម
ប៊ីចេង ១គីឡូក្រាម
ថវិកាឧបត្ថម្ភចំនួន ២០,០០០រៀល។

បន្ទាប់ពីបានបញ្ចប់ពិធីសម្ពោធខាងលើ ឯកឧត្តមអភិបាលខេត្ត រួមជាមួយថ្នាក់ដឹកនាំខេត្ត និងលោកអភិបាលស្រុក ក៏បានបន្តអញ្ជើញចុះពិនិត្យដោយផ្ទាល់នូវ វឌ្ឍនភាពការងារ និងការផ្តល់សេវាពិនិត្យ ព្យាបាលជំងឺជូនប្រជាពលរដ្ឋ នៅមន្ទីរពេទ្យបង្អែកស្រុកកំពង់ត្របែក ប្រកបដោយយកចិត្តទុកដាក់ និងស្និទ្ធស្នាលបំផុត៕

ប្រភព.រដ្ឋបាលស្រុកកំពង់ត្របែក