លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាលបានអញ្ជើញចូលរួមពិធីប្រកាសបើកដំណើរការជាផ្លូវការច្រកទ្វារព្រំដែនអន្តរជាតិផ្លូវគោកជ្រៃធំ-ខាញ់ប៊ិន ដើម្បីលើកកម្ពស់ពាណិជ្ជកម្ម និងកិច្ចសហប្រតិបត្តិការកម្ពុជា-វៀតណាម
ខេត្តកណ្តាល៖ នៅព្រឹកថ្ងៃសៅរ៍ ៧រោច ខែភទ្របទ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៣ ខែតុលា ឆ្នាំ២០២៦ ពិធីប្រកាសបើកដំណើរការជាផ្លូវការនូវ «ច្រកទ្វារព្រំដែនអន្តរជាតិផ្លូវគោកជ្រៃធំ-ខាញ់ប៊ិន» ត្រូវបានប្រារព្ធធ្វើឡើងយ៉ាងអធិកអធម នៅទីតាំងច្រកទ្វារព្រំដែនផ្ទាល់ ស្ថិតក្នុងស្រុកកោះធំ ខេត្តកណ្តាល។
ពិធីដ៏ថ្លៃថ្លានេះបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ ឯកឧត្តម គួច ចំរើន អភិបាល នៃគណៈអភិបាលខេត្តកណ្តាល (ភាគីកម្ពុជា) និង ឯកឧត្តម ហូ វ៉ាន់មឹង ប្រធានគណៈកម្មាធិការប្រជាជនខេត្តអានយ៉ាង (ភាគីវៀតណាម) ដោយមានការអញ្ជើញចូលរួមពី លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល ព្រមទាំងថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ និងប្រតិភូអមដំណើរនៃប្រទេសទាំងពីរយ៉ាងច្រើនកុះករ។
ការដំឡើងកម្រិតច្រកទ្វារព្រំដែននេះ គឺជាសមិទ្ធផលប្រវត្តិសាស្ត្រថ្មីមួយទៀត ក្នុងការផ្លាស់ប្តូរមុខមាត់តំបន់ព្រំដែននៃខេត្តកណ្តាល និងខេត្តអានយ៉ាង។ ព្រឹត្តិការណ៍នេះនឹងចូលរួមចំណែកយ៉ាងសំខាន់ដូចជា៖
សម្រួលការធ្វើដំណើរ៖ ផ្តល់ភាពងាយស្រួល និងរហ័សជូនដល់ប្រជាពលរដ្ឋនៃប្រទេសទាំងពីរ ក៏ដូចជាភ្ញៀវទេសចរអន្តរជាតិក្នុងការឆ្លងកាត់ព្រំដែន។
ជំរុញសេដ្ឋកិច្ច និងពាណិជ្ជកម្ម៖ បើកផ្លូវទូលំទូលាយសម្រាប់ការផ្លាស់ប្តូរទំនិញ នាំចេញ-នាំចូល និងបង្កើនទំហំពាណិជ្ជកម្មទ្វេភាគីរវាងកម្ពុជា និងវៀតណាម។
ពង្រឹងកិច្ចសហប្រតិបត្តិការ៖ រក្សាសន្តិសុខ សណ្តាប់ធ្នាប់សាធារណៈ និងពង្រឹងចំណងមិត្តភាព កិច្ចសហប្រតិបត្តិការល្អរវាងអាជ្ញាធរ និងកងកម្លាំងប្រដាប់អាវុធនៅតាមបណ្តោយព្រំដែន។
ពិធីប្រកាសបើកដំណើរការនេះ បានបញ្ចប់ទៅដោយបរិយាកាសរីករាយ ស្និទ្ធស្នាល និងបង្ហាញពីការប្តេជ្ញាចិត្តខ្ពស់ក្នុងការកសាងព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍប្រកបដោយចីរភាព ។អត្ថបទការិ.ព័ត៌មាន លោក ឃិន ជុន
No comments:
Post a Comment