ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន អញ្ជើញដឹកនាំប្រតិភូក្រសួង ដាក់កម្រងផ្កា និងគោរពវិញ្ញាណក្ខន្ធសព ឯកឧត្តម ខៀវ មុត សមាជិកព្រឹទ្ធសភា

(រាជធានីភ្នំពេញ)៖ នារសៀលថ្ងៃទី១៧ ខែតុលា ឆ្នាំ២០២៦ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានអញ្ជើញដឹកនាំប្រតិភូថ្នាក់ដឹកនាំក្រសួងព័ត៌មាន អញ្ជើញដាក់កម្រងផ្កា និងគោរពវិញ្ញាណក្ខន្ធសព ឯកឧត្តម ខៀវ មុត សមាជិកព្រឹទ្ធសភា ប្រធានក្រុមសមាជិកព្រឹទ្ធសភាប្រចាំភូមិភាគទី៥ និងជាអនុប្រធានគណៈកម្មការសិទ្ធិមនុស្ស ទទួលពាក្យបណ្តឹង និងអង្កេត និងអធិការកិច្ចនៃព្រឹទ្ធសភា ដែលបានទទួលមរណភាពក្នុងជន្មាយុ ៧៦ឆ្នាំ ដោយរោគាពាធ។

ក្នុងបរិយាកាសប្រកបដោយក្តីសោកសង្រេង និងអាលោះអាល័យជាពន់ពេក ឯកឧត្តម រដ្ឋមន្ត្រី នេត្រ ភក្ត្រា ព្រមទាំងប្រតិភូក្រសួងព័ត៌មាន បានចូលរួមសម្តែងនូវការសោកស្តាយយ៉ាងជ្រាលជ្រៅ និងរំលែកទុក្ខយ៉ាងក្រៀមក្រំបំផុតជាមួយក្រុមគ្រួសារនៃសព ឯកឧត្តម ខៀវ មុត។

មរណភាពរបស់ ឯកឧត្តម ខៀវ មុត គឺជាការបាត់បង់នូវឥស្សរជនជាន់ខ្ពស់មួយរូប ដែលបានបូជាកម្លាំងកាយ ចិត្ត ប្រជ្ញាស្មារតី និងមានគុណបំណាច់យ៉ាងធំធេងក្នុងការបម្រើជាតិ សាសនា ព្រះមហាក្សត្រ ជាពិសេសការបំពេញបេសកកម្មបម្រើប្រជាពលរដ្ឋ និងការពារសិទ្ធិមនុស្សក្នុងជួរព្រឹទ្ធសភានៃព្រះរាជាណាចក្រកម្ពុជានាពេលកន្លងមក។

ស្ថិតក្នុងសមានទុក្ខដ៏ក្រៀមក្រំនេះ ឯកឧត្តម នេត្រ ភក្ត្រា និងប្រតិភូក្រសួងព័ត៌មាន ទាំងមូល សូមឧទ្ទិសបួងសួងដល់ដួងវិញ្ញាណក្ខន្ធរបស់ ឯកឧត្តម ខៀវ មុត បានយោនយកកំណើតក្នុងសុគតិភព កុំបីឃ្លៀងឃ្លាតឡើយ៕រូបថត ឡុង ដេវីតនិងអត្ថបទការិ.ព័ត៌មាន លោក ឃិន ជុន