សម្ដេចធិបតី ហ៊ុន ម៉ាណែត អញ្ជើញជាអធិបតីភាពក្នុងពិធីប្រគល់សញ្ញាបត្រជូននិស្សិតជ័យលាភីសាកលវិទ្យាល័យ UME ខេត្តបាត់ដំបង
ខេត្តបាត់ដំបង៖ នៅព្រឹកថ្ងៃទី៨ ខែតុលា ឆ្នាំ២០២៦ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីប្រគល់សញ្ញាបត្រជូនដល់សមណនិស្សិត និងនិស្សិតជ័យលាភីថ្នាក់បរិញ្ញាបត្រ និងបរិញ្ញាបត្រជាន់ខ្ពស់ សរុបចំនួន ២ ០០១អង្គ/នាក់ (នារី ១ ២៥១នាក់) នៃសាកលវិទ្យាល័យគ្រប់គ្រង និងសេដ្ឋកិច្ច (UME) សាខាខេត្តបាត់ដំបង។
នៅក្នុងឱកាសនោះ សម្ដេចធិបតី ហ៊ុន ម៉ាណែត បានថ្លែងប្រសាសន៍សំណេះសំណាល និងផ្តល់អនុសាសន៍ណែនាំសំខាន់ៗដល់និស្សិតជ័យលាភី និងអាជ្ញាធរពាក់ព័ន្ធ៖
១. ការបណ្ដុះបណ្ដាលធនធានមនុស្ស និងគុណភាពអប់រំ៖ សម្ដេចធិបតីបានគូសបញ្ជាក់ថា ការកសាងមូលធនមនុស្សជាអាទិភាពគន្លឹះរបស់រាជរដ្ឋាភិបាល។ សម្ដេចបានរំលឹក និងលើកទឹកចិត្តដល់និស្សិតទាំងអស់ថា «ការបរាជ័យនៅក្នុងការសិក្សា ប្រសើរជាងបរាជ័យនៅក្នុងជីវិត ហើយការរៀននៅក្នុងសាលាក៏ជាមេរៀនសម្រាប់ជីវិតផងដែរ» ដើម្បីឱ្យយុវជនខិតខំប្រឹងប្រែង រៀនសូត្រឱ្យច្បាស់លាស់ ក្រសោបយកចំណេះដឹង និងជំនាញពិតប្រាកដ។
២. ការអភិវឌ្ឍហេដ្ឋារចនាសម្ព័ន្ធក្នុងខេត្តបាត់ដំបង៖ សម្ដេចធិបតីបានប្រកាសព័ត៌មានរីករាយជូនប្រជាពលរដ្ឋខេត្តបាត់ដំបង ដោយបានបញ្ជាក់ថា រាជរដ្ឋាភិបាលកំពុងរៀបចំដេញថ្លៃចុងក្រោយដើម្បីចាប់ផ្ដើមការជួសជុល និងស្ដារឡើងវិញនូវផ្លូវសំខាន់ៗក្នុងក្រុងបាត់ដំបង នាខែវិច្ឆិកា ខាងមុខ ដើម្បីសម្រួលដល់ការធ្វើដំណើរ និងលើកកម្ពស់សេដ្ឋកិច្ចក្នុងតំបន់។
៣. កាតព្វកិច្ចការពារបូរណភាពទឹកដី៖ សម្ដេចធិបតីបានគូសបញ្ជាក់ជាថ្មីពីកាតព្វកិច្ចដ៏ម៉ឹងម៉ាត់របស់រាជរដ្ឋាភិបាលក្នុងការការពារទឹកដី ដោយជ្រើសរើសវិធីសាស្ត្រចរចា និងការដោះស្រាយប្រកបដោយសន្តិវិធី និងភក្តីភាព ដើម្បីធានាសុវត្ថិភាពពលរដ្ឋ។
សាកលវិទ្យាល័យគ្រប់គ្រង និងសេដ្ឋកិច្ច (UME) ត្រូវបានបង្កើតឡើងក្នុងឆ្នាំ១៩៩៨ និងទទួលបានការទទួលស្គាល់ជាផ្លូវការពីរាជរដ្ឋាភិបាលក្នុងឆ្នាំ២០០៦។ ចាប់តាំងពីបង្កើតឡើង UME បានពង្រីកវិសាលភាពនៃការបណ្តុះបណ្តាលរបស់ខ្លួនជាបន្តបន្ទាប់ ចាប់ពីកម្រិត បរិញ្ញាបត្ររង, បរិញ្ញាបត្រ, បរិញ្ញាបត្រជាន់ខ្ពស់ រហូតដល់ថ្នាក់បណ្ឌិត។
សាកលវិទ្យាល័យបានបំពេញបេសកកម្មយ៉ាងសកម្មក្នុងការ៖
ឆ្លើយតបតម្រូវការទីផ្សារការងារ៖ បណ្តុះបណ្តាលកម្លាំងពលកម្មដែលមានចំណេះដឹង ជំនាញច្បាស់លាស់ និងប្រកបដោយសីលធម៌ ដើម្បីផ្គត់ផ្គង់ដល់ស្ថាប័នរដ្ឋ វិស័យឯកជន និងអង្គការក្រៅរដ្ឋាភិបាល។
លើកកម្ពស់ស្មារតីសហគ្រិនភាព៖ ផ្តល់មូលដ្ឋានគ្រឹះចំណេះដឹង និងបំណិនជីវិតយ៉ាងរឹងមាំ ដែលបញ្ជ្រាបភាពជាអ្នកដឹកនាំ និងការបង្កើតអាជីវកម្ម/មុខរបរផ្ទាល់ខ្លួនដល់និស្សិត បង្កើតឱកាសការងារបន្ថែមក្នុងសហគមន៍។
អភិវឌ្ឍន៍តំបន់ភាគពាយ័ព្យ៖ ចូលរួមចំណែកកាត់បន្ថយគម្លាតនៃការទទួលបានការអប់រំកម្រិតឧត្តមសិក្សានៅតាមបណ្តាខេត្ត និងលើកកម្ពស់កម្រិតជីវភាពប្រជាពលរដ្ឋក្នុងតំបន់។
ពិធីប្រគល់សញ្ញាបត្រនេះ មិនត្រឹមតែជាការអបអរសាទរចំពោះជោគជ័យនៃការសិក្សារបស់និស្សិតជ័យលាភីប៉ុណ្ណោះទេ ប៉ុន្តែជាសក្ខីភាពនៃភាពជោគជ័យរបស់ UME និងការយកចិត្តទុកដាក់ខ្ពស់របស់រាជរដ្ឋាភិបាលកម្ពុជាក្នុងការកសាងធនធានមនុស្សសម្រាប់អនាគតប្រទេសជាតិ។ អត្ថបទការិ.ព័ត៌មាន លោក ឃិន ជុន
No comments:
Post a Comment